Тайфун дауылды жел мен нөсер жауын-шашын әкелді. Қытайда «қызыл» деңгейдегі дабыл жарияланды, деп хабарлады Вairaqmedia.kz.
Биылғы жылдың басынан бері тіркелген 13-ші тайфун — «Дольфин» Қытайдың оңтүстік-шығысы мен Тайваньға соққы берді, деп хабарлайды Синьхуа.
Чжэцзян провинциясында желдің жылдамдығы секундына 45 метрге жетті.
Тайфунға байланысты Чжэцзян провинциясының әкімшілік орталығы Ханчжоу қаласындағы Сяошань халықаралық әуежайында 388 рейс тоқтатылды.
Қытайдың Ұлттық метеорологиялық орталығы (ҰМО) табиғи апаттан зардап шеккен аймақтардағы жергілікті билік органдарына аса қатты нөсерден қорғану шараларын қабылдау қажеттігін ескертті.
Тайваньда қатты жел мен нөсер жауын-шашын әкелген «Дольфин» тайфуны ағаштарды құлатып, тоннельдерге зақым келтіріп, тас құлауларына себеп болды. Тайвань бойынша барлығы 632 оқиға тіркелді. Алты адам жарақат алды.
Қытайда тайфундар туралы ескерту жүйесіндегі ең жоғары деңгей — «қызыл» дабыл жарияланды. ҰМО-ның бас синоптигі Сюй Инлунның айтуынша, шілдеде елге соққы берген «Бави» тайфунымен салыстырғанда, «Дольфин» бұдан да қатты жел мен мол жауын-шашын әкелуі мүмкін.
