Журналист Камшат Тасболат "Шай в большом городе" фильміне қатысты жасалған насихат жұмыстары мен коуч Құралай ханымның даулы сөзіне байланысты құқықтық баға беруді талап етті. Бұл туралы ол Facebook-тегі парақшасында жазды, деп хабарлайды bairaqmedia.kz.

Камшат Тасболаттың айтуынша, фильмге көрермен тарту мақсатында түрлі манипуляциялық әрекеттер байқалған. Алайда қоғамда ең көп талқыға түскені — Құралай ханымның әлеуметтік желідегі жазбасы.

"Қолынан түк келмейтін, бітірген дымы жоқ, сыншы диванбатырлар отанымды жемей, 3000 теңгеге зарламай, барып қолдаңдар Мөлдірді" деген пікір журналистің наразылығын тудырған.

Ол мұндай сөздің этикалық қана емес, құқықтық тұрғыдан да тексерілуі қажет екенін атап өтті.

«Отан» сияқты қастерлі ұғымды боқауыз мағынасында қолдану — мүлде қабылданбайтын әрекет. Ешбір елдің азаматы өзінің «родина», «homeland» сөзін қорлап сөйлемейді. Мұндай сөздер заң аясында да бағалануы керек», – дейді Тасболат.

Журналистің мәліметінше, өткен жылы Қазақстанда боқауыз айтқаны үшін 8 мыңнан астам адам әкімшілік жауапкершілікке тартылып, 70 мың теңге айыппұл салынған. Осыған байланысты ол Құралай ханымға да дәл осындай шара қолдануды ұсынады.

«Өзін коучпын, танымалмын деп жүрген адам халыққа дөрекі сөйлеуге құқылы емес. Бұл — ел алдында тұрған тұлғаға мүлде лайық емес мінез. Айыппұл салынса, басқаларға да сабақ болар еді», – дейді Камшат Тасболат.

Сонымен қатар журналист ел ішінде фильмге бойкот жарияланып жатқанын атап өтіп, кино саласындағы сапа мәселесін де қозғады.

Оның айтуынша, шынайы жақсы фильмге көрерменді жарнамамен немесе манипуляциямен емес, сапасымен тарту керек.