Павлодар облысы Железин ауданында прокуратура мемлекеттік тұрғын үйді бөлу барысында бірқатар өрескел заңбұзушылықты анықтады, деп хабарлайды Bairaqmedia.kz.

Тексеру нәтижесінде пәтерлер лауазымды тұлғаларға тұрғын үй комиссиясының алдын ала шешімінсіз және тиісті жалға алу келісімшарттарын жасамай берілгені белгілі болды.

«Ауданда «Кел де, тұра бер» деген бейресми қағида қалыптасқан», – делінген прокуратура хабарламасында.

Мәселен, 2022 жылдан бастап Башмачинск мектебінің мұғалімі жетім балаға арналған пәтерді заңсыз пайдаланып келген.

Сонымен қатар, 70 жалға алушы жалға алу төлемдерін төлеу міндеттемесін орындамаған. Қарыз сомасы шамамен 6,5 миллион теңгеге жеткен. Алайда ауданның жергілікті атқарушы органдары бұл қарызды өндіріп алу шараларын қабылдамаған.

Тексеру барысында мемлекеттік тұрғын үйлердің кей жағдайларда үшінші тұлғаларға берілгені анықталды. Қызығы, тұрғын үй кезегінде тұрған азаматтардың тізімінде қайтыс болған адамдар да бар екені белгілі болды.

Әкімдіктің балансында бос тұрған 65 пәтер бар болса да, тұрғын үйге мұқтаж 209 азамат үйсіз жүр. Мысалы, Мынкөл ауылында төрт пәтер бос тұрғанымен, кезекте бес адам, оның ішінде көпбалалы отбасы, жетім балалар және әлеуметтік осал топтардың өкілдері бар, – делінген хабарламада.

Құқықбұзушылықтар Мемлекеттік қызмет істері департаментінің этика жөніндегі кеңесінде қаралып, Железин ауданындағы нақты сектор экономикасы бөлімінің басшысы қызметтік міндеттерін толық орындамағаны үшін ескерту түрінде тәртіптік жауапкершілікке тартылды.