Алматыда жұбайын пышақтап өлтірген бұрынғы полиция қызметкері Серік Накимов 15 жылға бас бостандығынан айырылды. Сондай-ақ сот оны марқұмның жақындарына 10 миллион теңге моральдық өтемақы төлеуге міндеттеді, деп хабарлады Bairaqmedia.kz.
Бұл туралы КТК жазды. Бір жарым жыл бұрын болған резонансты қылмысқа қатысты сот үкімі шықты. Тергеу барысында 39 жастағы Серік Накимовтың әйелін балалардың көзінше пышақтап өлтіргені дәлелденген.
Бұған дейін тағайындалған екі сараптаманың қорытындысында айыпталушы қылмыс жасаған сәтте аффект жағдайында болғаны көрсетілген. Алайда бұл мән-жай сот үкімін жеңілдетуге негіз болмады.
Наурызбай аудандық соты Серік Накимовты Қылмыстық кодекстің 99-бабы 2-бөлігінің 5-тармағы бойынша кінәлі деп танып, 15 жылға бас бостандығынан айырды. Ол жазасын орташа қауіпсіздік мекемесінде өтейді.
Сонымен қатар сот марқұмның жақындарына 10 миллион теңге моральдық өтемақы және өкілдердің қызметіне төленген шығын ретінде 3 миллион теңге өндіру туралы шешім шығарды.
Марқұмның туыстары бұған дейін айыпталушыны өмір бойына бас бостандығынан айыруды сұраған. Дегенмен сот шешіміне қатысты көңілдері толатынын жеткізді.
«Үкімге көңілім толып тұр. Бірақ мен өмір бойына соттауды сұраған едім. Аллаға шүкір, бұған да шүкір. Ендігі жазасын Алла берсін», – деді марқұмның жақыны.
Ал жәбірленуші тараптың адвокаты Мейірман Шекеев моральдық өтемақы көлеміне қатысты апелляциялық шағым түсіру мәселесі қарастырылатынын айтты.
«Бұл үкімге қанағаттанамыз. Себебі екі сараптама да оны аффект жағдайында болған деп көрсеткен еді. Егер жәбірленуші моральдық шығын көлеміне көңілі толмаса, осы бөлігі бойынша апелляциялық шағым беруіміз мүмкін», – деді заңгер.
Айта кетейік, Серік Накимов ішкі істер органдарында 15 жыл қызмет еткен. Қайғылы оқиғадан кейін ол өзіне де қол жұмсамақ болған.
Сот үкімі әзірге заңды күшіне енген жоқ.
