Астана – Павлодар тасжолындағы ауыр жол апатынан кейін екі аяғынан айырылған 20 жастағы студенттің ісіне қатысты жаңа дерек шықты. Көлік жүргізген Арыс қаласы әкімінің ұлына қатысты қылмыстық іс рақымшылық негізінде тоқтатылған, деп хабарлады Вairaqmedia.kz.
Апат 2026 жылғы 29 мамырда болған. Оқу сессиясынан кейін Павлодардағы үйіне қайтып бара жатқан Талғат мінген Hyundai Tucson металл қоршауға соғылған. Қоршау көлік салонын тесіп өтіп, артқы орында отырған студент ауыр жарақат алған. Дәрігерлер оның екі аяғын да ампутациялауға мәжбүр болған.
Желідегі деректерге сүйенсек, көлік тізгінінде Арыс қаласының әкімі Қайсар Маңқараевтың 22 жастағы ұлы Ердәулет Закиров болған. Павлодар облысының полиция департаменті қылмыстық істің тоқтатылғанын растады.
«16 қыркүйекте жол-көлік оқиғасы фактісі бойынша қылмыстық іс 2026 жылғы 1 шілдедегі рақымшылық актісі негізінде тоқтатылып, бекіту үшін Екібастұз қаласының прокуратурасына жолданды», – делінген полиция жауабында.
Зардап шеккен тарапқа азаматтық тәртіппен сотқа жүгіну ұсынылған. Қазір Талғат үйінде. Алда оны күрделі операция мен ұзақ оңалту кезеңі күтіп тұр.
Бұған дейін Арыс әкімі ұлына қатысты тергеуге қызметтік жағдайын пайдаланып ықпал етпейтінін мәлімдеген. Оның тергеуге араласқаны туралы расталған дерек жоқ.
