Ұлттық құндылықтарды қорғау – ішкі саясаттың басты бағыты болуға тиіс. Бұл туралы Мәжіліс депутаты, «AMANAT» партиясы фракциясының мүшесі Еділ Жаңбыршин премьер-министр Олжас Бектеновке жолдаған депутаттық сауалында айтты, деп хабарлайды Bairaqmedia.kz.

Оның айтуынша, геосаяси ықпалын күшейтуді көздейтін кейбір сыртқы күштер ұлттық құндылықтарды жоюға бағытталған түрлі қозғалыстарды қаржыландырып, қоғамда іріткі салуға ұмтылып отыр. 

«Мемлекеттердің ұлттық құндылықтарын жоюға бағытталған әсірефеминистік, ЛГБТ, эмо және басқа да субъмәдениеттік қозғалыстар арнайы, жоспарлы түрде миллиондаған АҚШ долларымен қаржыландырылды. Одан қалса, олар ұлтараздық пен діни алауыздықты, сепаратизм мен трайбализмді біздің саяси күн тәртібімізге енгізуге күш салды», – деді депутат.

Сондай-ақ, ол шетелдік гранттарға тәуелді кейбір үкіметтік емес ұйымдардың елдегі жағдайды әдейі ушықтырып, шетелдік демеушілеріне жалған есеп беретінін атап өтті. 

Депутат мемлекет басшысының тапсырмасымен әзірленіп жатқан ішкі саясат тұжырымдамасының маңыздылығына да тоқталды.

«Бұл құжат ел мүддесі үшін саяси топтарды біріктіріп, ұлттық құндылықтарымызды негізге ала отырып, сыртқы күштердің мемлекет ішіндегі деструктивті әрекеттеріне тосқауыл қоюға мүмкіндік береді»,– деп қорытындылады ол.