1 қыркүйектен бастап студенттердің стипендиясы өседі. Бұл туралы Ғылым және жоғары білім вице-министрі Гүлзат Көбенова Орталық коммуникациялар қызметінде өткен брифингте айтты, деп жазады bairaqmedia.kz.
Биылғы ұлттық бірыңғай тестілеуге 210 мыңнан астам талапкер қатысқан екен. Солардың ішінде 160,5 мыңы шекті балды жинап, студент атануға мүмкіндік алған. Орташа балл шамамен 69 болып шықты. Яғни, балалардың басым бөлігі жоғары оқу орнына түсуге жолдама алған.
Грантқа деген қызығушылық та жылдан-жылға артып жатыр. Биыл 113 мыңдай өтініш түсіпті, бұл өткен жылмен салыстырғанда 9 мыңға артық. Үкімет тарапынан 93 мыңнан аса грант бөлінген, оның басым бөлігі бакалавриатқа берілген. Нәтижесінде гранттар дерлік түгел игеріліпті.
Енді ең басты жаңалық – стипендия. Вице-министрдің айтуынша, кейінгі бес жылда студенттердің шәкіртақысы екі есе өскен.
Ал 2025 жылдың 1 қыркүйегінен бастап жаңа мөлшер енгізіледі:
• бакалавр студенттері айына 52 372 теңге алады;
• педагогикалық мамандықтағы студенттерге 84 000 теңге төленеді;
• магистранттарға 117 098 теңге;
• докторанттарға 262 500 теңге беріледі.
Осылайша, білім алып жүрген жастардың жағдайын жақсартуға бағытталған тағы бір қадам жасалды. Бұл жаңалық студенттердің көңілін біршама көтерері анық.
Айта кетейік, бұған дейін Қаржы министрі Мәди Такиев алдағы үш жылға арналған республикалық бюджетті таныстырған болатын. Онда әлеуметтік салаға 10,7 трлн теңгеден астам қаржы бөлінетіні айтылды. Оның ішінде зейнетақы мен жәрдемақыны 10%-ға көтеру, қосымша 288 мың адамды әлеуметтік төлемдермен қамту, студенттердің стипендиясын өсіру және 19 мыңнан аса жаңа білім грантын қаржыландыру жоспары бар.
Яғни, алдағы уақытта мемлекет жастарға да, әлеуметтік жағынан қолдауды қажет ететін топтарға да көбірек көңіл бөледі деген сөз.
