Желіде экс-министр Қуандық Бишімбаевтың әкесі Таразда Bishimbayev University деп аталатын жоғары оқу орнын ашатыны туралы ақпарат тарады. Осыған қатысты Ғылым және жоғары білім министрлігі жауап берді деп хабарлайды bairaqmedia.kz

Желідегі ақпаратқа сәйкес, Уәлихан Бишімбаев университетті ашып, әрі оған өзі басшылық етпек екен. Жазбада университет жаңа оқу жылынан бастап талапкерлерді қабылдайтыны және азаматтық, қылмыстық, халықаралық, корпоративтік, қаржылық және салықтық құқықты оқытуға маманданғаны, сондай-ақ, зияткерлік меншік пен арбитражды оқытатыны айтылған. 

Ғылым және жоғары білім министрлігінің өкілі бұл ақпаратқа қатысты пікір білдірді.

«Білім туралы» заңға сәйкес кадр даярлау бағыттары мен оқыту нысандары бойынша жоғары білім беру қызметімен айналысу үшін заңды тұлғаларға лицензия қажет. Оны беру ғылым және жоғары білім саласындағы уәкілетті органның құзыретіне жатады дейді министрлік өкілі.

 Ал, түрмеде отырған экс-министрдің әкесіне мұндай лицензия берілмеген.

Министрлік Bishimbayev University атауымен білім беру қызметін жүзеге асыруға лицензия берілгенін жоққа шығарады. Сондай-ақ , «е-лицензиялау» ақпараттық жүйесінде тиісті өтінімнің болмағанын хабарлайды, - деді министрліктің баспасөз хатшысы Олжас Беркінбаев Facebook желісіндегі жазбасында.