Қазақстанда құқық бұзушылық профилактикасы туралы заңға өзгерістер енгізілгені туралы Түркістан облысы Дін істері басқармасына қарасты «Дін мәселелерін зерттеу орталығы» ескертеді, - деп хабарлайды bairaqmedia.kz

Енді қоғамдық орындарда адамның бет-әлпетін тануға кедергі келтіретін киімдерді киюге шектеу қойылады. Бұл өзгеріс қоғамдық қауіпсіздікті қамтамасыз ету азаматтарды анық сәйкестендіру мақсатында қабылданып отыр. 12 шілдеден бастап күшіне енген заңнама нормасының негізгі мақсаты – азаматтардың құқықтары мен бостандықтарын, оның ішінде діни сенім бостандығын шектемей, қоғамдық қауіпсіздікті қамтамасыз ету, адамдардың тұлғасын тану мен қоғамдық тәртіпті сақтау, - делінген Дін мәселелерін зерттеу орталығының видеосында.

Айта кетерлігі, Қазақстанға келген шетел азаматтары да қолданыстағы заңдармен танысып, оларды сақтауға міндетті.

Мемлекет өз азаматтарының және қонақтарының қауіпсіздігін қамтамасыз етумен қатар, әркімнің мәдени және діни ерекшеліктеріне құрметпен қарайды. Қоғамда түсініспеушілік туындамас үшін келесі ережелерге назар аударыңыз: Қоғамдық орындарда бетті толық жасыратын киімдер, мысалы никаб, паранжа, балклава, масқа және т.б. киюге тыйым салынады. Заңды қолдануда қауіпсіздік пен жеке құқықтарды сақтау арасындағы теңдік қатаң ескеріледі. Бұл шаралар қоғамда тәртіп пен өзара құрметті нығайтып, әрбір адамның өз қауіпсіздігіне сенімді болуына мүмкіндік береді, - дейді мамандар.