Астанада қоғамдық көлік қағып кеткен жасөспірім қыздың жағдайы ауыр деп бағаланып отыр. Дәрігерлер оның өмірі үшін күресіп жатыр, деп хабарлайды Bairaqmedia.kz.
Қайғылы жағдай 28 қазан күні кешке елорданың Байтұрсынов көшесінде болған. IVECO маркалы қоғамдық автобус жолдан өтіп бара жатқан қызды қағып кеткен. Астана қалалық полиция департаментінің мәліметінше, жасөспірім жолдың белгіленбеген тұсынан өтпек болған. Автобус жүргізушісі шұғыл тежегішті басқанымен, жол-көлік оқиғасының алдын ала алмаған. Кенет тежелу салдарынан автобус салонындағы тағы үш жолаушы жарақат алған. Осылайша, жол апатынан барлығы төрт адам зардап шекті. Олардың барлығы медициналық мекемеге жеткізілген. Астана қалалық денсаулық сақтау басқармасы автобус қағып кеткен қыздың қазіргі жағдайына қатысты ақпарат берді.
«Науқасқа қажетті медициналық көмек көрсетіліп жатыр. Оның жағдайы ауыр, бірақ тұрақты деп бағаланады», – деп хабарлады басқарма өкілдері.
Оқиға туралы ақпарат алғашында әлеуметтік желілерде тараған. Куәгерлердің айтуынша, жол апатынан кейін оқиға орнына жедел жәрдем қызметкерлері келіп, жарақат алған қызды ауруханаға алып кеткен. Қазіргі уақытта полиция жол-көлік оқиғасының барлық мән-жайын анықтап жатыр. Тиісті тексеру жүргізілуде.
