Мәжілістің эск-депутаты, белгілі заңгер Абзал Құспан соңғы күндері «Яндекс такси» қызметіне қатысты туындаған жағдайдан кейін отандық «Апару» және «Қажет» такси сервистерінің айналасында өрбіген пікірталасқа байланысты цифрландыру саласына жауапты азаматтарға үндеу жасады, деп хабарлады Bairaqmedia.kz.
Ол өзінің әлеуметтік желідегі жазбасында цифрландыру саласының дамуына үлес қосып жүрген Бағдат Мусин мен Жаслан Мәдиевке тікелей жүгініп, қазіргі жағдайға қатысты түсініктеме беру қажеттігін атап өтті.
Абзал Құспанның айтуынша, ол осы уақытқа дейін аталған азаматтардың атына сын айтпаған және олардың жұмысына құрметпен қарайды. Дегенмен, «Яндекс такси» төңірегіндегі мәселелер қоғамда, әсіресе қазақ тілді ортада қызу талқыланып жатқандықтан, жауапты тұлғалардың пікір білдіруі маңызды.
«Міне, дәл қазір сіздердің ел алдына шығып, жағдайды түсіндіріп, бағыт-бағдар беретін уақыттарыңыз емес пе? Еліміздің цифрлық болашағына жауапты азаматтар осындай сәтте сөйлемегенде, қашан сөйлейді?» — деп жазды Абзал Құспан.
Ол бұл үндеуді аталған азаматтардың жеке басына немесе атқарып жатқан жұмысына көлеңке түсіру мақсатында жазбағанын атап өтті. Оның сөзінше, қоғамға түсініксіз болып отырған мәселелерге қатысты жауап пен нақты түсіндіру қажет.
«Елге сөздеріңіз керек болып тұрған дәл осы сәтте неге үнсіз отырсыздар?» — деп түйіндеді депутат.
