Алматыда кәсіпкерді бопсалады деп айыпталған блогерлер мен қысым көрсеткен серіктестеріне қатысты сот басталды,  - деп хабарлайды bairaqmedia.kz

Іс Алматы қалалық қылмыстық істер жөніндегі ауданаралық сотында қаралып жатыр. Жәбірленуші Бахтияр Блаев құрылыс компаниясының иесі. Ал, айыпталып жатқан - содан қосалқы мердігер ретінде тапсырыс алған қос кәсіпкер мен олар жалдаған екі блогер.

Жәбірленушінің айтуынша, дау қосалқы мердігермен арада басталған. Яғни, серіктестері тапсырма алып, ақысын төлетіп, ақыр соңында өз міндеттерін дұрыс орындамапты. Сондықтан оларды сотқа беруге тура келген. Сөйтіп, сот шешімімен қос кәсіпкер атқарылмаған жұмыстың ақшасын қайтаруға міндеттеледі.

Олар маған 100 миллион теңге қарыз. Сол ақшаны қайтармау үшін осы блогерлерді жалдаған. Маған, отбасыма қатысты түрлі арандату әрекеттеріне барды, - деді кәсіпкер Бахтияр Блаев.

Айтуынша, олар бұл әрекетке миллиондаған қарызын қайтармау үшін барған. Яғни, кәсіпкердің соңына түсіп, блогерлерді жалдаған көрінеді. Сөйтіп, отбасының абыройын таптайтын видеолар түсіртіп, бопсалапты. 

Дегенмен, сотталушылар өздеріне тағылған айыппен келіспейді. Блогер Дамир Күшеевтің жұбайы күйеуінің видеоны бопсалау мақсатында емес, көзге көрініп тұрған кемшілікті көрсету үшін жариялағанын айтады.  Яғни, кәсіпкерлер арасындағы дауға еш қатысымыз жоқ деп отыр.

Адам бопсалайтын болса, видеоны жарияламайды ғой. Ол видеоны салды. Дамир ондай адам емес, - деді Дамир Күшеевтің әйелі.

Еске салсақ, полиция 24 қаңтарда ақша бопсалады деген күдікпен екі блогер мен кәсіпкерді ұстаған болатын. Олар жәбірленушіден 8 миллион теңге бопсалап, тағы 20 миллион теңге қарызын кешіруді талап еткен. Күдіктілер ақшаны алу кезінде ұсталған. Қылмыс адамдар тобының алдын ала сөз байласуымен жасалғандықтан жетi жылға дейiнгi бас бостандығынан айыру жазасы көзделген.