Алматыда тауға серуендеуге шыққан адамдарды қар көшкіні басып қалды, деп хабарлады Төтенше жағдайлар министрлігі.
Министрліктің мәліметінше, Медеу ауданындағы Титов асуында, 3400 метр биіктікте төрт адамнан тұратын туристер тобы қар көшкіні астында қалған. Олардың біреуі өздігінен шыға алмаған. Құтқарушылар қар астынан мәйітті алып шықты.
Әлеуметтік желіде қаза тапқан адамның 19 жастағы студент қыз екенін жазып жатыр.
Оқиға орнына Алматы қалалық Төтенше жағдайлар департаментінің 23-әмбебап құтқару бөлімшесі, "Барыс" РММ қызметкерлері, кинологиялық жасақ пен еріктілер жедел түрде жіберілді.
Іздестіру-құтқару жұмыстары барысында ұшқышсыз ұшу аппараты пайдаланылды.
