قازاقستاندىقتاردىڭ ءموبيلدى اۋدارىمدارى قىركۇيەكتەن باستاپ تەكسەرىلە باستايدى، بۇل تۋرالى قارجى ۆيسە-مينيسترى ەرجان ءبىرجانوۆ مالىمدەدى، دەپ حابارلايدى Bairaqmedia.kz.

ونىڭ ايتۋىنشا، ءموبيلدى اۋدارىمدارعا قاتىستى زاڭ قابىلدانىپ، قىركۇيەكتە كۇشىنە ەنبەك.

 ءۇشىنشى كريتەريي – اقشا سوماسى بويىنشا – سونى كوزدەيتىن بۇيرىق تا دايىن. ول بۇگىن قابىلدانعان زاڭ جوباسىنان كەيىن قابىلدانۋى كەرەك ەدى. زاڭ قابىلداندى، ول 60 كۇن ىشىندە كۇشىنە ەنەدى. سايكەسىنشە، ءبىز نورماتيۆتىك قۇجاتتى بەكىتىپ، جۇمىسقا كىرىسەمىز. قىركۇيەكتە باستالادى، – دەدى ءبىرجانوۆ.

سونداي-اق، ول سالىق ورگاندارى قانداي اۋدارىمداردى باقىلاۋعا الاتىنىن ءتۇسىندىردى.

ەگەر اناسى قىزىنا، اكەسى نەمەسە باۋىرى بىر-بىرىنە اقشا اۋدارسا، بۇل جەردە ەشقانداي سۇراق تۋىندامايدى. ءتىپتى 1 نەمەسە 2 ميلليون تەڭگە بولسا دا. تاعى دا قايتالاپ ايتامىن: ءۇش بىردەي كريتەريي قاتار ورىندالۋى كەرەك. ءبىرىنشى – 100 ءتۇرلى ادام. ەگەر ەكى ادام بىر-بىرىنە نەمەسە ءتىپتى 10 ادام اراسىندا اقشا اۋدارسا، بۇل كريتەرييگە ساي كەلمەيدى. ەكىنشى – ءۇش اي قاتارىنان 100 ادام ءبىر ادامعا اقشا اۋدارسا. ءۇشىنشى – جالپى سوما 1 ميلليون تەڭگەدەن اسۋى كەرەك، – دەپ ءتۇسىندىردى ۆيسە-مينيستر.