مەملەكەت باسشىسى مۇناي-گاز سالاسىنىڭ قىزمەتكەرلەرىن كاسىبي مەرەكەسىمەن قۇتتىقتادى، دەپ حابارلادى اقوردا.
اقوردادا وتكەن سالتاناتتى جيىندا قاسىم-جومارت توقايەۆ مۇناي-گاز كەشەنى ەل ەكونوميكاسىنىڭ اسا ماڭىزدى سالاسى ەكەنىن ايتتى.
"جالپى، ەلىمىزدەگى مۇناي-گاز ونەركاسىبىنىڭ وزىندىك ءداستۇرى، باي تاريحى بار. وسى سالانىڭ قالىپتاسىپ، وركەندەۋىنە بىرنەشە بۋىن وكىلدەرى زور ەڭبەك ءسىڭىردى. سىزدەردى اعا بۋىننىڭ لايىقتى ءىزباسارى دەۋگە بولادى. ءقازىر مۇناي-گاز سالاسىندا ەكى ءجۇز مىڭنان استام ادام جۇمىس ىستەيدى. سىزدەردىڭ تاباندى ەڭبەكتەرىڭىزدىڭ ارقاسىندا قازاقستانىمىز وركەندەپ، كوركەيىپ جاتىر. مەن مۇنى جوعارى باعالايمىن. بارىڭىزگە شىنايى ريزاشىلىعىمدى بىلدىرەمىن"، – دەدى قاسىم-جومارت توقايەۆ.
پرەزيدەنت بىلتىر قازاق مۇنايىنىڭ 125 جىلدىعى اتالعانىن ەسكە سالىپ، بيىل دا وسى سالا ءۇشىن ايتۋلى جىل ەكەنىنە توقتالدى.
سونىمەن قاتار، قاسىم-جومارت توقايەۆ قازاقستان شيكىزات وندىرۋمەن قاتار، ونى تەرەڭ وڭدەۋگە باسا ءمان بەرەتىنىن ايتتى.
ول اتىراۋ، پاۆلودار، شىمكەنت قالالارىندا ورنالاسقان ءۇش ءىرى مۇناي وڭدەۋ زاۋىتى جاڭعىرتىلعانىن، جۇيەلى جۇمىستىڭ ناتيجەسىندە 13 ميلليونعا جۋىق ادام تابيعي گازعا قول جەتكىزگەنىن مالىمدەدى.
