تۇركىستان وبلىسى كەنتاۋ قالاسىنداعى ونەركاسىپ ايماعىنىڭ 900 گا اۋماعىندا 2075 جىلعا دەيىن توتەنشە ەكولوگيالىق جاعداي جاريالاندى دەپ حابارلايدى bairaqmedia.kz

ءتيىستى بۇيرىققا ەكولوگيا جانە تابيعي رەسۋرستار ءمينيسترى قول قويعان.

تۇركىستان وبلىسى كەنتاۋ قالاسىنىڭ ونەركاسىپتىك ايماعىنىڭ 900 گا اۋماعى توتەنشە ەكولوگيالىق جاعداي ايماعى دەپ جاريالانسىن. توتەنشە ەكولوگيالىق جاعداي ايماعىنا سولتۇستىكتەن تۇركىستان وبلىسىنىڭ كەنتاۋ قالاسىنا ىرگەلەس جاتقان اۋدانى 900 گا وندىرىستىك ايماقتىڭ اۋماعى كىرەدى. توتەنشە ەكولوگيالىق جاعدايداعى اۋماقتىڭ ورنالاسۋىنىڭ كارتا-سحەماسى 1-سۋرەتتە كورسەتىلگەن، - دەلىنگەن رەسمي قۇجاتتا.

مينيسترلىك توتەنشە ەكولوگيالىق جاعداي ايماعىن جاريالاۋ مەرزىمىن ەلۋ جىل دەپ بەكىتكەن جانە وسى ارالىقتا قانداي شەكتەۋلەر بولاتىنىن جازعان.  

وسى مەرزىم ارالىعىندا توتەنشە ەكولوگيالىق ايماق اۋماعىندا مىنانداي شەكتەۋلەر بولادى: كەلۋ جانە كەتۋدىڭ ەرەكشە رەجيمىن بەلگىلەۋ، كولىك قۇرالدارىنىڭ ءجۇرىسىن شەكتەۋ؛ قىزمەتى توتەنشە ەكولوگيالىق جاعدايدى جويۋعا نەمەسە حالىقتىڭ تىنىس-تىرشىلىگىن قامتاماسىز ەتۋگە بايلانىستى ەمەس جاڭا كاسىپورىندار مەن باسقا دا وبەكتىلەردى سالۋعا جانە جۇمىس ىستەپ تۇرعاندارىن كەڭەيتۋگە تىيىم بەلگىلەۋ؛ ادامدارعا تۇراقتى نەمەسە ۋاقىتشا تۇرۋعا ارنالعان ءۇي-جايلاردى مىندەتتى تۇردە بەرە وتىرىپ، ولاردى تۇرۋىنا ءقاۋىپتى جەرلەردەن كوشىرۋ؛ جوعارى ەكولوگيالىق ءقاۋىپ توندىرەتىن دەپ تانىلعان وبەكتىلەردى سالۋعا جانە ولاردىڭ جۇمىس ىستەۋىنە تىيىم سالۋ؛ ساۋىقتىرۋ، كۋرورتتىق ماقساتتاعى وبەكتىلەردىڭ جۇمىس ىستەۋىنە تىيىم سالۋ؛ ادامدارعا، وسىمدىكتەر الەمىنە، جانۋارلار دۇنيەسىنە جانە باسقا دا تابيعي وبەكتىلەرگە جوعارى ەكولوگيالىق ءقاۋىپ توندىرەتىن كەز كەلگەن باسقا دا قىزمەتتى جۇزەگە اسىرۋعا تىيىم سالۋ نەمەسە شەكتەۋ.