قازاقستان اقش پرەزيدەنتى دونالد ترامپتىڭ گازا سەكتورىنداعى قاقتىعىستى توقتاتۋعا ارنالعان جان-جاقتى بىتىمگەرلىك جوسپارىن قولدايدى، دەپ حابارلادى قازاقستان پرەزيدەنتىنىڭ باسپا ءسوز حاتشىسى رۋسلان جەلدىباي.
"مەملەكەت باسشىسى قاسىم-جومارت توقايەۆ ەلىمىز بۇل باستامانى تاياۋ شىعىستاعى احۋالدى رەتتەۋگە، مەملەكەتتەر اراسىنداعى سەنىمدى نىعايتىپ، اتالعان ايماقتا بەيبىتشىلىك ورناتۋعا بىرەگەي مۇمكىندىك ءارى ماڭىزدى قادام رەتىندە قاراستىراتىنىن مالىمدەدى"، - دەپ جازىلعان حابارلامادا.
بۇعان دەيىن اق ءۇي اقش پرەزيدەنتى دونالد ترامپتىڭ گازا سەكتورىنداعى قاقتىعىستى توقتاتۋ جونىندەگى 20 تارماقتان تۇراتىن جوسپارىن جاريالاعان بولاتىن.
قۇجات پالەستينالىق حاماس قوزعالىسى مەن "باسقا توپتار" گازانى باسقارۋعا تىكەلەي نەمەسە جاناما تۇردە قاتىسپاۋعا كەلىسۋلەرى كەرەكتىگىن قاراستىرادى.
سونىمەن قاتار اقش گازا سەكتورىندا شۇعىل ورنالاستىرۋ ءۇشىن ۋاقىتشا حالىقارالىق تۇراقتاندىرۋ كۇشتەرىن قۇرۋ بويىنشا اراب جانە حالىقارالىق سەرىكتەستەرمەن ىنتىماقتاستىق ورناتادى.
قۇجاتتا ارنايى ەكونوميكالىق ايماق قۇرۋ دا قاراستىرىلعان، وندا قاتىسۋشى ەلدەرگە جەڭىلدىكتى شارتتار قولدانىلادى.
