بلگىلى ءانشى مۇرات قوجا «العاشقى» باعدارلاماسىنا سۇحبات بەرىپ، باسىنان وتكەن قيىن ساتتەرىن ەسىنە الدى، دەپ حابارلايدى bairaqmedia.kz.

ءانشى كەيىنگى كەزدە نەگە ساحناعا شىقپاي كەتكەنىن ايتتى. ول دەنساۋلىعى سىر بەرىپ، قيىن كەزەڭدى باستان وتكەرگەنىن جەتكىزدى.

«ادام ومىردە ەسىنە العىسى كەلمەيتىن دۇنيەلەر بولادى. وندايدى دۇشپانىڭا دا تىلەمەيسىڭ. ءولىم مەن ءومىردىڭ اراسىندا ارپالىسىپ جاتقان وتە قيىن ەكەن. قۇدايعا «مەنى الىپ كەتشى، بولدى، شارشادىم» دەپ جالىنعان كەزدەرىم بولدى. مەنى كورىپ، قاسىمداعى جاقىندارىم قينالدى. ءبىر جىل اربادا وتىردىم. ونىڭ الدىندا ءتىپتى، وتىرا دا المايتىن ەدىم. ەكى اي تەك قيمىلداماي جاتتىم، ءتۇرلى دارىمەن. دۇعالار قابىل بولعان شىعار. دوستارىمنىڭ ايتۋىمەن الماتىعا كەلىپ ەمدەلىپ، ءبىر جىلدىڭ ىشىندە اياققا تۇردىم. بۇل دەرتتىڭ دياگنوزى جوق. ءبىراز جەرگە بارىپ، تەكسەرىلدىم. اراقتان اۋرۋ تاپتىم، كەيبىر اقپارات بويىنشا. دۋالانعان اراق ءىشىپ قويىپپىن. مەنى دۋالاۋ ايەل ادامنىڭ قولىنان كەلگەن نارسە ەكەن. ءبىر ەمەس، جەتى رەت دۋالاپتى. اقشاسى بولماسىن، بالا-شاعاسىنان ايىرىلسىن، باۋىرلارىنىڭ جولى بولماسىن دەپ تىلەگەن ەكەن. ءبارى ورىندالدى. شاۋىپ جۇرگەن شەشەم اياق استىنان دۇنيەدەن وزدى. ءبىر باۋىرىم ءوزىن قورعايمىن دەپ سوتتالىپ كەتتى»، – دەدى ءانشى.