بلوگەر، ءانشى رۇستەم جۇگىنىسوۆ ءدىني ارازدىقتى قوزدىرعانى ءۇشىن ايىپپۇل تولەيدى. جۇگىنىسوۆتىڭ ءىسى استانا قالاسىنىڭ سوتىندا قارالدى، دەپ حابارلايدى bairaqmedia.kz.

Orda.kz مالىمەتىنشە تالاپ-ارىزدى ءدىن ىستەرى باسقارماسىنىڭ وكىلدەرى بەرگەن، ولار ءانشىنىڭ جاريالانىمدارىنان ارازدىقتى قوزدىرۋ بەلگىلەرىن كورگەن.

جازبالارىنىڭ بىرىندە بلوگەر جاڭا جىلدى تويلاماۋعا شاقىرعان. ونىڭ پىكىرىنشە، اتا-بابالارى بۇل مەيرامدى تويلاماعان، سوندىقتان جاڭا جىلدى مەرەكەلەۋ – ءوز دىنىنەن جانە داستۇرىنەن باس تارتۋ ەكەن.

سونداي-اق بلوگەر اقتوبەدەگى مەشىتتە ورىن العان وقيعادان كەيىن ايەلدەرگە ۇندەۋ جاساعان. ونىڭ ايتۋىنشا، ايەلدەر ۇيدەن كوپ شىقپاۋى كەرەك، ءتىپتى مەشىتكە دە بارماعانى ءجون. ول ايەلدەرگە تەك اكەسى، اعاسى نەمەسە ەر تۋىسىمەن بىرگە عانا ءجۇرۋدى ۇسىنعان.

سوت وتىرىسى جونىندە رەسمي حابار بەرىلگەنىنە قاراماستان بلوگەر سوتقا كەلمەگەن.

سوت شەشىمىمەن ول قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 453-بابىنىڭ 2-بولىگى بويىنشا (قازاقستان رەسپۋبليكاسىنىڭ اۋماعىندا الەۋمەتتىك، ناسىلدىك، ۇلتتىق، ءدىني، سوسلوۆيەلىك جانە تەكتىك ارازدىقتى قوزدىرۋعا باعىتتالعان دەرەكتەر مەن ماتەريالدار بار بۇقارالىق اقپارات قۇرالدارى ءونىمىن تاراتۋ) اكىمشىلىك قۇقىق بۇزۋشىلىق جاساعانى ءۇشىن كىنالى دەپ تانىلىپ، وعان 78 640 تەڭگە كولەمىندە اكىمشىلىك ايىپپۇل سالىندى.