ماسكەۋ وبلىسىندا الماتى وبلىسىنىڭ اكىمى مارات سۇلتانعازييەۆ پەن ماسكەۋ وبلىسىنىڭ گۋبەرناتورى اندرەي ءۆوروبوۆ كەزدەسىپ، ەكى ءوڭىر اراسىنداعى باسىم باعىتتاعى ارىپتەستىكتى تالقىلادى، - دەپ حابارلايدى bairaqmedia.kz
جيىن الماتى جانە ماسكەۋ وبلىستارىنىڭ كاسىپكەرلەرىنە ارنالعان بيزنەس-فورۋم قارساڭىندا ءوتتى. كەزدەسۋگە قازاقستان رەسپۋبليكاسىنىڭ رەسەي فەدەراسياسىنداعى توتەنشە جانە وكىلەتتى ەلشىسى داۋرەن ابايەۆ تا قاتىستى.
اندرەي ءۆوروبوۆ قازاقستاننان كەلگەن دەلەگاسياعا العىسىن ءبىلدىرىپ، ەكىجاقتى قارىم-قاتىناستى نىعايتۋعا ەرەكشە ءمان بەرىلەتىنىن اتاپ ءوتتى.
سىزدەردىڭ ماسكەۋ وبلىسىنا كەلىپ، ءارتۇرلى سالاداعى ىنتىماقتاستىقتى تالقىلاۋعا ۋاقىت بولگەندەرىڭىزگە قۋانىشتىمىز. قازاقستاندىق كاسىپكەرلەردىڭ جوبالارى پودموسكوۆەدە ىسكە اسسا، ال ءبىزدىڭ بيزنەس وكىلدەرى قازاقستاندا ەركىن جۇمىس ىستەي السا، بۇل ەكى جاق ءۇشىن دە ءتيىمدى بولماق. بۇگىنگى فورۋم وسى باعىتتاعى ناقتى قادامداردىڭ ءبىرى، – دەدى ول.
الماتى وبلىسىنىڭ دەلەگاسياسى سولنەچنوگورسك قالاسىنداعى «ەسيپوۆو» يندۋستريالدى پاركىن ارالاپ، «لايت يندۋستريال» ۇلگىسىمەن تانىستى. بۇل جوبا ءوندىرىستى نەبارى ءۇش ايدا ىسكە قوسۋعا مۇمكىندىك بەرەدى. سوندىقتان شاعىن جانە ورتا بيزنەس ءۇشىن ءتيىمدى شەشىم سانالۋدا.
مارات سۇلتانعازييەۆ تە ماسكەۋ وبلىسىمەن ۇقساستىقتاردى اتاپ ءوتتى.
ءبىزدىڭ ايماقتىڭ دامۋ باعىتى دا، ورنالاسۋى دا ۇقساس – ءبىز الماتىنى قورشاساق، سىزدەر ماسكەۋدىڭ اينالاسىنداسىزدار. ەكونوميكالىق قۇرىلىم دا سايكەس كەلەدى. قازاقستاندىق كاسىپكەرلەردىڭ ماسكەۋ وبلىسىندا جۇمىس ىستەۋگە قىزىعۋشىلىعى بار، سونداي-اق ماسكەۋ وبلىسىنىڭ بيزنەسى الماتى وبلىسىنا كەلۋگە نيەتتى. بۇل – ءوندىرىس پەن لوگيستيكا سالاسىنداعى ىنتىماقتاستىقتى كەڭەيتۋگە جول اشادى، – دەدى ول.
سونداي-اق، سۇلتانعازييەۆ رەسەيلىك ارىپتەسىن الماتى وبلىسىنا رەسمي ساپارمەن كەلۋىن ۇسىندى.
سوڭعى بەس جىلدا ماسكەۋ وبلىسىنىڭ قازاقستانمەن تاۋار اينالىمى 1،8 ەسەگە ارتقان. قازىرگى تاڭدا قازاقستاندىق نارىقتا پودموسكوۆەدە وندىرىلەتىن كوسمەتيكا، حيميا، فارماسيەۆتيكا، پوليمەرلەر، ماشينا جاساۋ ونىمدەرى، مەتالل جانە اۆتوكومپونەنتتەرگە سۇرانىس جوعارى.
وتكەن جىلى ماسكەۋ وبلىسىنىڭ ءبىرقاتار وندىرۋشىلەرى – سەرپۋحوۆ، لوسينو-پەتروۆسكيي، رامەنسك، ليۋبەرسى، سەرگييەۆو-پوساد وكرۋگتەرىنىڭ كاسىپورىندارى قازاقستانمەن 177 ەكسپورتتىق كەلىسىمشارت جاساسىپ، ءوز ونىمدەرىن جەتكىزە باستادى.
