پرەمەر-مينيستر ولجاس بەكتەنوۆ كۇماندى جانە ءتيىمسىز الەۋمەتتىك تولەمدەر مەن جاردەماقىلاردى الىپ تاستاۋدى تاپسىردى، دەپ حابارلايدى bairaqmedia.kz.
ۇكىمەتتىڭ بۇگىنگى وتىرىسىندا پرەزيدەنت جولداۋى كەزىندە بەرىلگەن تاپسىرمالار قارالدى.
سونىڭ ىشىندە الەۋمەتتىك تولەمدەر ماسەلەسى دە بار. پرەمەر-مينيستر الدىمەن 1 جەلتوقسانعا دەيىن بارلىق وڭىرلەردە الەۋمەتتىك قولداۋ شارالارىنىڭ ءبىرىڭعاي ستاندارتىن ازىرلەۋدى تاپسىردى.
“بارلىق كۇماندى جانە ءتيىمسىز الەۋمەتتىك تولەمدەر مەن جاردەماقىلاردى الىپ تاستاۋ قاجەت. بولدى. وسى ماسەلەدە نۇكتە قويۋ كەرەك. ءبىز الەۋمەتتىك ادىلەتتىلىكتى ساقتاپ، ماسىلدىق پيعىلدى ازايتۋ ءۇشىن شارالار قابىلدايتىن بولامىز. ۇكىمەتتىڭ مىندەتى - بارلىعىنا بىردەي جاعداي جاساۋ. ال ازاماتتار جۇمىس ىستەپ، ءوزىن جانە ءوز وتباسىن اسىراۋعا ۇمتىلۋى كەرەك. مەملەكەت باسشىسى ءدال وسى ماسەلەگە ايرىقشا كوڭىل ءبولىپ وتىر”، - دەدى بەكتەنوۆ.
وسى ورايدا پرەمەر سيفرلىق تەحنولوگيالاردى كەڭىنەن قولدانۋ قاجەتتىگىن ەرەكشە اتاپ ءوتتى.
بيىل 1 قاراشاعا دەيىن الەۋمەتتىك سالانىڭ ءبىرىڭعاي سيفرلىق پلاتفورماسى ەنگىزىلۋى شارت. ال الەۋمەتتىك كودەكستە الەۋمەتتىك اۋديت تەتىكتەرى بەكىتىلەدى.
