تۇركىستان قالاسىنداعى "دوستىق ۇيىندە" وبلىستىق قازاقستان حالقى اسسامبلەياسى جانىنداعى عىلىمي-ساراپشىلىق توپ پەن جاس عالىمدار كلۋبىنىڭ بىرلەسكەن وتىرىسى ءوتتى، - دەپ حابارلايدى bairaqmedia.kz
باسقوسۋعا عىلىمي-ساراپشىلىق توپ پەن جاس عالىمدار كلۋبىنىڭ مۇشەلەرى، "قوعامدىق كەلىسىم" كمم-نىڭ ءبولىم باسشىلارى مەن ماماندارى جانە ۇستازدار قاتىستى.
كۇن تارتىبىنە سايكەس، جيىندا 2025 جىلدىڭ ءۇشىنشى توقسانىنا ارنالعان بىرلەسكەن جۇمىس جوسپارىنىڭ ورىندالۋ بارىسى، جاستار اراسىندا ەتنوسارالىق كەلىسىمدى نىعايتۋ باعىتىندا اتقارىلعان عىلىمي جانە تاربيەلىك ءىس-شارالار جايى تالقىلاندى. سونداي-اق، قازاقستان حالقى اسسامبلەياسىنىڭ 30 جىلدىعىنا ارنالعان عىلىمي باستامالاردى پىسىقتاۋ، عىلىمي-ساراپشىلىق توپ پەن جاس عالىمدار كلۋبى اراسىنداعى ارىپتەستىكتى نىعايتۋ جولدارىن قاراستىرۋ بويىنشا ۇسىنىس-پىكىرلەر ورتاعا سالىندى.
جيىنعا مودەراتورلىق ەتكەن قوجا احمەت ياسساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ پروفەسسورى، وبلىستىق قازاقستان حالقى اسسامبلەياسىنىڭ جانىنداعى عىلىمي-ساراپشىلىق توپ جەتەكشىسى سەيدۋللا سادىقوۆ عىلىمي-ساراپشىلىق توپ پەن جاس عالىمدار كلۋبىنىڭ بىرلەسكەن جۇمىسىنىڭ ماڭىزدىلىعىنا توقتالىپ، ءۇشىنشى توقسان كولەمىندە ورىندالعان نەگىزگى ءىس-شارالارعا قىسقاشا شولۋ جاسادى.
"قوعامدىق كەلىسىم" كمم-ى ەتنوسارالىق قاتىناستار سالاسىنىڭ مونيتورينگى جانە اقپاراتتىق-ناسيحاتتىق جۇمىستاردى ۇيىمداستىرۋ ءبولىمىنىڭ باسشىسى حاميت يساقوۆ اقپاراتتىق-ناسيحاتتىق جۇمىستار بويىنشا وڭىردە اتقارىلىپ جاتقان شارالار تۋرالى بايانداپ، جاستاردىڭ بۇل ۇدەرىسكە بەلسەندى تارتىلۋ قاجەتتىگىن اتاپ ءوتتى.
جاس عىلىمدار كلۋبىنىڭ مۇشەسى نۇرسۇلتان پوشانوۆ جاس عالىم رەتىندە جۇرگىزىپ جاتقان عىلىمي-زەرتتەۋ جۇمىستارى جونىندە بايانداما جاسادى. ول جاستار اراسىندا قوعامدىق كەلىسىم مەن تولەرانتتىلىقتى قالىپتاستىرۋعا باعىتتالعان جوبالار جايلى ايتىپ، تاجىريبە الماسۋ الاڭدارىن ءجيى وتكىزۋدى ۇسىندى.
عىلىمي-ساراپشىلىق توپ مۇشەسى ماقپال انلاماسوۆا قازىرگى الەۋمەتتىك جاعداي مەن ەتنوسارالىق تۇراقتىلىقتى ساقتاۋ جولىنداعى عىلىمي كوزقاراستارىن ءبىلدىرىپ، پراكتيكالىق ۇسىنىستار ايتتى.
تۇركىستان وبلىسىنىڭ ءدىن ىستەرى باسقارماسىنىڭ «ءدىن ماسەلەلەرىن زەرتتەۋ ورتالىعى» كمم-نىڭ ءبولىم باسشىسى قايرات سالىقبايەۆ ءدىن مەن قوعام اراسىنداعى قارىم-قاتىناس، ءدىني اعىمداردىڭ جاستار ساناسىنا ىقپالى تۋرالى عىلىمي نەگىزدەگى پىكىرىن ءبىلدىردى. ول جاس عالىمدار كلۋبىمەن بىرلەسىپ زەرتتەۋ جوبالارىن جۇزەگە اسىرۋ مۇمكىندىگىن اتاپ ءوتتى.
جيىندى قورىتىندىلاعان سەيدۋللا سادىقوۆ مەملەكەتىمىزدىڭ قوعامدىق كەلىسىم مەن بىرلىك ساياساتى قازىرگى كۇردەلى گەوساياسي احۋال جاعدايىندا ءوزىنىڭ وزەكتىلىگىن ارتتىرىپ وتىرعانىن جەتكىزدى.
وسى رەتتە جاس عالىمدار ەتنوسارالىق قاتىناستار، ۇلتتىق بىرلىك، ءدىني سانا جانە قوعامدىق كەلىسىم ماسەلەلەرى بويىنشا زەرتتەۋلەر جۇرگىزىپ، عىلىمي ماقالالار ازىرلەۋدە. ءبىز مۇنى وتە قۇپتارلىق ءۇردىس دەپ سانايمىز. سەبەبى، عىلىمي نەگىزسىز قوعامدىق كەلىسىم تۋرالى تەك ايتىلىپ قانا قويسا، ونىڭ اياسى شەكتەۋلى بولىپ قالادى. ال عىلىمي ساراپتامالار مەن ناقتى دەرەكتەرگە سۇيەنگەن ۇسىنىستار قوعاممەن، مەملەكەتتىك قۇرىلىمدارمەن بايلانىس ورناتۋعا جول اشادى. بۇگىندە جاستاردىڭ بويىندا ۇلتتىق بىرلىك پەن ازاماتتىق جاۋاپكەرشىلىك سەزىمىن قالىپتاستىرۋ اسا ماڭىزدى. بۇل تەك تاربيە جۇمىستارى ارقىلى ەمەس، عىلىمي-زەرتتەۋ مەن تاجىريبەلىك جوبالار ارقىلى دا جۇزەگە اسۋى ءتيىس. ءبىز وسى ماقساتتا جاس زەرتتەۋشىلەرگە ادىستەمەلىك جانە مورالدىق قولداۋ كورسەتۋدى جالعاستىرامىز. قازاقستان حالقى اسسامبلەياسىنىڭ 30 جىلدىق مەرەيتويىنا وراي بىرلەسكەن عىلىمي جوبالار، كونفەرەنسيالار مەن بايقاۋلار ۇيىمداستىرۋدى ۇسىنامىز. بۇل — جاستار ءۇشىن ءوز يدەيالارىن ىسكە اسىرۋعا جانە قوعامعا پايدالى بولۋعا تاماشا مۇمكىندىك، - دەدى ول.
وتىرىس بارىسىندا الداعى ءىس-شارالاردى بىرلەسە اتقارۋ ماقساتىندا قاۋلى قابىلداندى. وعان سايكەس، جاستار اراسىندا ەتنوسارالىق كەلىسىمدى نىعايتۋعا باعىتتالعان عىلىمي زەرتتەۋلەر مەن ساۋالنامالار جۇرگىزۋ جوسپارلانعان. بۇل رەتتە، عىلىمي-ساراپشىلىق توپ پەن جاس عالىمدار كلۋبىنىڭ ءوزارا ارىپتەستىگىن ارتتىرۋ ماقساتىندا ورتاق ءىس-شارالار كۇنتىزبەسى ازىرلەنىپ، ورتا ءبىلىم بەرۋ ۇيىمدارىنا (مەكتەپتەرگە) ارنالعان "تولەرانتتىلىق"، "ەتنوسارالىق كەلىسىم"، "مادەني ارتۇرلىلىكتى قۇرمەتتەۋ" تاقىرىپتارىندا ادىستەمەلىك نۇسقاۋلىقتار ازىرلەنىپ، پەداگوگتەرگە تاراتىلماق.
