Túrkistan qalasy ákimdiginiń qoldaýymen «Farab» ámbebap ǵylymı kitaphanasynda dástúrli ónerdi nasıhattaýǵa arnalǵan «Dástúrin dáriptegen Áz - Túrkistan» atty ánshi, jyrshy-termeshiler men kúıshilerdiń óner festıvali ótti, dep habarlaıdy bairaqmedia.kz

İs-shara Memleket basshysy Q.K.Toqaevtyń «Túrkistan qalasyna erekshe mártebe berý týraly» Zańynyń aıasynda jáne Túrkistan oblysynyń qurylǵanyna 7 jyl tolýyna oraı uıymdastyryldy.

Festıváldiń basty maqsaty – Túrkistan qalasynyń tarıhı, mádenı, rýhanı kelbetin tanytý, óńirden shyqqan óner ıeleri men elge eńbegi sińgen tulǵalardyń shyǵarmashylyǵyn nasıhattaý, halyqtar dostyǵy men saıası turaqtylyqty dáripteý, sondaı-aq «Jumysshy mamandyqtar jyly» aıasynda eńbek adamdarynyń beınesin jyrǵa qosyp, jas urpaqty ulttyq tárbıe men rýhanı muraǵa baýlý.

Saltanatty ashylý rásiminde Túrkistan qalasy ákiminiń orynbasary Mekenhan Qozyhanuly quttyqtaý sóz sóılep, Túrkistan qalasynyń erekshe mártebesi týraly birqatar málimet berip,  ónerpazdarǵa sáttilik tiledi.

Festıválge Qazaqstannyń halyq ártisteri men dástúrli ónerdiń daraboz ókilderi qatysty. Olardyń qatarynda dástúrli án óneriniń maıtalmandary Ramazan Stamǵazy men Aıgúl Qosanova, jyrshylyq ónerdiń ókilderi Jaken Omarov, Kúnsulý Túrikpen, Marat Súgirbaı, Aıazbek Rýstamov jáne Rýslan Ahynbekov, sondaı-aq terme men án janryn sheber meńgergen Orazáli Jańabaı, Muhamedáli Bekpeıisov, Álimjan Serikbaev syndy ónerpazdar bar.

Sonymen qatar, kúı óneriniń ókilderi — dáýlesker kúıshiler Shyńǵys Isaev pen Jandos Kýlýmbetov óz ónerlerin ortaǵa salyp, kópshiliktiń ystyq yqylasyna bólendi.

Bul rýhanı shara kórermenderge tereń áser qaldyryp, ulttyq ónerge degen qurmetti arttyrdy. Túrkistan tórinde ótken bul óner merekesi — halqymyzdyń mádenı murasyn ulyqtaýǵa arnalǵan taǵylymdy ári taǵdyrly basqosý boldy.