Qazaqstan prezıdenti Úndistan premer-mınıstrine kóńil aıtý jedelhatyn joldady, dep habarlaıdy Bairaqmedia.kz.
Memleket basshysy Qasym-Jomart Toqaev Úndistan premer-mınıstri Narendra Modıge Ahmedabad qalasy áýejaıynyń mańynda bolǵan jolaýshylar ushaǵy apatynan kóptegen adamnyń qaza tabýyna baılanysty kóńil aıtty.
Qazaqstan prezıdenti áýe apatynan qaıtys bolǵan azamattardyń otbasylary men jaqyndaryn sabyrǵa shaqyryp, jaraqat alǵandardyń tezirek saýyǵyp ketýlerine tilektestik bildirdi.
Aıta ketsek, Air India áýe kompanıasyna tıesili Boeing 787 Dreamliner ushaǵy Ahmadabadtan Londonǵa baǵyt alǵan reıs kezinde ushyp shyqqannan keıin kóp uzamaı apatqa ushyraǵan.
Jergilikti BAQ-tyń jazýynsha, bortta 232 jolaýshy jáne 12 ekıpaj múshesi bolǵan bolýy múmkin.
