Jastar arasynda tanymal qazaqstandyq ALPHA tobynyń múshesi Daryn Amangeldi (Dark) súıiktisine 16 jasynan bastap zorlyq-zombylyq kórsetken. Bul týraly Dana atty qyzdyń ózi aıtyp bergen, dep habarlaıdy Azattyq Rýhy.
Dana men Daryn 2022 jyly Instagram jelisi arqyly tanysqan, bir jyldan keıin kezdese bastaıdy. Ol kezde qyzdyń jasy nebári 16-da bolǵan.
«Ol kúndiz-túni hat jazatyn edi. Jalańash keýdesiniń sýretin jiberetin. Bir jyldan keıin ol maǵan súıiktisi bolýǵa usynys jasady», - deıdi Dana.
Olar dos bolǵan eki jyl ýaqyt aralyǵynda boıjetken odan fızıkalyq jáne psıhologıalyq qysym kórgen.
«Maǵan moraldyq qysym kórsetti. Ony súıgendikten bárine kóz juma qaradym. Ashyq, qysqa kıim kıýge, keıbir qurbylarymmen aralasýǵa tyıym saldy. Agresıaǵa berilgen kezde fızıkalyq kúsh qoldandy. Maǵan bári ony tastap ket deıtin, biraq men ol tek qyzǵanyshtan jasaıtyn bolar dep oıladym, qamqor bolǵany shyǵar dedim», - deıdi qyz.
Aıtýynsha, ánshi onyń syrt kelbetine kóńili tolmaı, salmaq tastaýyn talap etken. Sodan keıin keıin boıjetken aryqtatatyn dáriler iship, densaýlyǵyna zıan keltirip alǵan.
Dana oqıǵasyn jelige jarıalaǵan soń, oǵan basqa da jas qyzdar hat jazyp, Darynnan zardap shekkenderin aıta bastaǵan.
Jelidegi shýdan keıin ánshiniń ózi kópshiliktiń aldyna shyǵyp, tyńdarmandarnan jylap turyp keshirim surady. Ony shyǵarmashylyq komandasy quramnan shyǵaryp jiberdi.
«Uzaq ári baıypty talqylaýlardan keıin, eki taraptyń ortaq sheshimimen 2025 jyldyń 13 maýsymynda ALPHA toby men Daryn Amangeldi arasyndaǵy birlesken jumys resmı túrde toqtatyldy. Dark – toptyń qalyptasýynda erekshe kezeńniń mańyzdy bóligi boldy. Ol toptyń alǵashqy qadamdarynan bastap tyńdarman júregine jol tapqan sátterge deıin birge júrip, kóptegen este qalar sátterdiń kýási boldy. Biz oǵan osy ýaqytqa deıin qosqan úlesi úshin alǵysymyzdy bildiremiz jáne shyǵarmashylyq jolyna sáttilik tileımiz», - dep jazdy ALPHA toby resmı paraqshasynda.
Aıta ketsek, buǵan deıin tanymal akter Serik Sháriptiń burynǵy súıiktisi Álıa Býteeva óziniń zorlyq-zombylyq qurbany bolǵanyn aıtyp, lıft ishindegi vıdeosyn saldy. Olda akter qyzdy julqylap alyp ketken. Al onyń bul áreketine qatysty akterdiń burynǵy jubaıy, tanymal reper Say Mo (aty-jóni – Móldir Esembek) pikir bildirip, birneshe jyl buryn ózi de odan taıaq jegenin aıtqan. Sálem Entertainment kompanıasy Serik Shárippen áriptestigin toqtatty. Medıakompanıa ony qara tizimge engizgenin atap ótti. Óz kezeginde akter jasaǵan isine ókinetinin, zań aıasynda óziniń jazasyn alýǵa daıyn ekenin aıtty. Serik Sháriptiń ústinen is qozǵalyp, 5 táýlikke qamalyp shyqty.
