Ánshi Samat Janǵazın Qaırat Nurtasty avtorlyq quqyqty buzdy dep aıyptap otyr, dep habarlaıdy Bairaqmedia.kz.

Daýdyń ózegi – «O, mahabbat, ǵajapsyń» atty án.

Janǵazınniń aıtýynsha, bul týyndyǵa ózi bir jyldaı eńbektenip, kompozıtor Dáýren Shárippen jáne aranjırovka jasaǵan Azamat Sábetovpen birge jumys istegen. Án resmı túrde avtorlyq quqyqpen qorǵalǵan. Samat ánniń tusaýkeserin ótkizip, beınebaıan túsirip úlgergen. Alaıda, birneshe kún buryn bul ándi Qaırat Nurtas oryndap shyqqan vıdeosy taralǵan.

«Daıyn ónimimizdi suramaı alyp, jaza salý degendi qalaı túsinesizder? Bul ándi jasap, jemisin jeımiz dep beınejazbalar túsirdik. Toı-dýman radıosyna baryp tusaýkeserin jasadyq. Bir-eki kúnnen beri túsiniksiz jaǵdaı boldy. Jurt Qaırat Nurtastyń vıdeosyn jiberip jatyr... Men adamgershilikke salynyp, sotqa júgingen joqpyn. Ózderinen jaýap kúttim. Storısime jazba qaldyrdym. «Avtorlyq quqyǵy qorǵalǵan ándi de Qaıratqa oryndaı berýge bola ma?» dep. Suramaı, daıyn ónimdi paıdalaný – ádiletsizdik. Bul — dıhannyń eńbegin pisken kezinde tartyp alǵanmen birdeı», – dep kúıindi Samat Janǵazın.

Ázirge Qaırat Nurtastyń tarapynan resmı jaýap berilgen joq. Tyńdarmandar arasynda Qaıratty sotqa berýge shaqyrǵandar da bar.

«Sotqa júginý kerek, qoǵamdyq rezonans týdyrmaı sheshimi tabylmaıtyn sıaqty ǵoı, jýrnalıstermen habarlasyp, pablıkterge salyp, bir shý shyǵarý kerek, tek sol kezde ǵana bir sheshimge kelersizder, daıyn asqa tik qasyq», «Avtorlyq quqyǵy qorǵalǵan án, zańdy jaýap berilsin!», «Sotqa ber. Haıp jasa. Aýdıtorıa jınap alýǵa múmkindik» degen pikirde ánshiniń tyńdarmandary.

Bul oqıǵa qazaqstandyq shoý-bızneste avtorlyq quqyq máselesiniń ózekti ekenin taǵy bir márte kórsetti.