Pavlodar oblysyndaǵy daýyl: bir adam qaza taýyp, 16 adam jaraqat aldy, dep habarlaıdy Bairaqmedia.kz.

Oblys ákimdiginiń málimetinshe, keshe aımaqta jyldamdyǵy sekýndyna 43 metrge deıin jetetin daýyldy jel tirkelgen. Daýyldy jel ınfraqurylymǵa aıtarlyqtaı zıan keltirip, elektr qýatynyń óshýine ákeldi jáne halyq arasynda jaraqat alý jaǵdaılary tirkeldi.

Tótenshe jaǵdaılar qyzmetiniń málimeti boıynsha, 16 adam zardap shekken, onyń ishinde úsh bala. Aqsýda 1968 jyly týǵan turǵyn qaıtys boldy.

Oblys ortalyǵynda 47 nysannyń, onyń ishinde 6 áleýmettik mekemeniń shatyryna zaqym keldi. Aqsý men Ekibastuzda 23 nysan, Baıanaýyl aýdanynda 7 nysan zaqymdaldy, sondaı-aq Maı jáne Pavlodar aýdandarynda ǵımarattardyń zaqymdanýy tirkeldi.

Oblystyń qalalary men aýdandarynyń elektrmen jabdyqtaý jelilerinde aqaýlar baıqalady. Qazir Aqsý qalasynda jáne Baıanaýyl aýdanynda elektr qýaty óshken.

Qazir apattyń saldaryn joıý boıynsha jumystar júrgizilip jatyr. Baılanys jáne elektrmen jabdyqtaý jelileriniń 16 baǵanasy qalpyna keltirilip jatyr. 300-den astam adam jáne 103 arnaıy tehnıka jumyldyrylǵan.

Barlyq shuǵyl áreket etý qyzmetteri kúsheıtilgen rejımde jumys istep jatyr.