Aýǵanstandy saýda-ekonomıkalyq qatynastarǵa tartý osy eldi qalpyna keltirýdi jyldamdatady. Bul týraly prezıdent Qasym-Jomart Toqaev «Ortalyq Azıa – Qytaı» İİ samıtinde aıtty, dep habarlaıdy Bairaqmedia.kz.
Bizdiń ózara is-qımylymyzdyń taǵy bir aspektisi – ol Aýǵanstan. Bizdiń oıymyzsha, bul eldi saýda-ekonomıkalyq qatynastarǵa tartý ony qalpyna keltirýge jáne halyqaralyq oqshaýlanýdan shyǵarýǵa yqpal etedi. Dál osy baǵytta biz Aýǵanstan úkimetimen jumys istep jatyrmyz. Qytaı men Ortalyq Azıa elderine Almaty qalasynda Ortalyq Azıa jáne Aýǵanstan úshin BUU-nyń Óńirlik ortalyǵyn qurýǵa qoldaý kórsetkeni úshin alǵysymdy bildiremin, - dedi Qasym-Jomart Toqaev.
Prezıdenttiń aıtýynsha, óńirdiń bolashaǵy osy aýmaqtaǵy elderdiń ózara múddelerdi eskere otyryp, birlesip áreket ete alýyna baılanysty. Osy oraıda «Ortalyq Azıa-Qytaı» formaty jasampaz strategıalyq seriktestiktiń aıqyn úlgisine aınalatynyna senim artty.
Aıta ketsek, Astanada «Ortalyq Azıa – Qytaı» İİ samıti jumysyn bastady. İs-sharaǵa memleket basshysy Qasym-Jomart Toqaev, QHR tóraǵasy Sı Szınpın, Ózbekstan prezıdenti Shavkat Mırzıóev, Qyrǵyzstan prezıdenti Sadyr Japarov, Túrikmenstan prezıdenti Serdar Berdimuhamedov jáne Tájikstan prezıdenti Emomalı Rahmon qatysyp jatyr.
