Oralda ózin polısıa qyzmetkeri retinde tanystyrǵan 30 jastaǵy alaıaq ustaldy, dep habarlaıdy Bairaqmedia.kz.

Oblystyq polısıa departamentiniń málimetinshe, kúdikti ózin uıymdasqan qylmyspen kúres basqarmasy qyzmetkeri retinde tanystyryp, aıyppul tóleý qajettiligi týraly syltaýmen 1983 jylǵy áıeldiń aqshasyn zańsyz ıemdengen.

Atalǵan derek boıynsha jedel izdestirý is-sharalary barysynda BQO polısıa departamentiniń ózindik qaýipsizdik basqarmasy men arnaıy maqsattaǵy bólimshe qyzmetkerleri 1995 jylǵy kúdiktini qolǵa túsirdi. Ol óz kinásin tolyq moıyndady. Tintý kezinde bank qosymshasynan úzindi kóshirme jáne eki uıaly telefon tárkilendi. Qazirgi ýaqytta atalǵan derek boıynsha QR QK 190-baby 1-bóligine (alaıaqtyq) sáıkes sotqa deıingi tergep-tekserý amaldary júrgizilip jatyr, - delingen habarlamada. 

Aıta ketsek, atalǵan bap boıynsha aıypty dep tanylǵan adam múlki tárkilenip, bir myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne alty júz saǵatqa deıingi merzimge qoǵamdyq jumystarǵa tartýǵa ne eki jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady.