Almaty oblysy Jalpaqsaı aýylynda 10 jasar balany talaǵan ıtter jekemenshik ońaltý ortalyǵyna tıesili bolyp shyqqan. Mekeme ókilderi bul jaǵdaıǵa balanyń ózin kinálap otyr, dep habarlaıdy Almaty.tv.
Fýtbol alańynda keshe alańsyz oınap júrgen jetkinshekti úsh ıt talap, saý-tamtyǵyn qaldyrmaǵan. Kýágerlerdiń aıtýynsha, olar qorshaýdy buzyp shyǵyp, alańǵa bettegen.
Jalpy aımaqty sholyp qarasaq, bul jerde "Abaılańyz, ıtter" degen úlken eskertý jazý tur. Biraq qorshaý shuryq-tesik. It túgil, adam ótip kete beredi. Jalpy aýyl turǵyndarynyń aıtýynsha, bul – eldimekendegi birinshi jaǵdaı emes. Oqıǵa keshe keshke qaraı bolǵan. Aýyl balalary ádettegideı fýtbol alańyna jınalǵan. Kenet eski qorshaýdan úsh birdeı ıt basa-kóktep kirip, balalardyń sońyna túsken.
Taǵy oqyńyz: «Qulaǵyn julyp alǵan»: Almaty oblysynda 10 jasar balany úsh ıt talap tastady
Kýágerlerdiń aıtýynsha, kóbi qashyp úlgergen. Al Mıhaıl esimdi 10 jastaǵy jetkinshekti ıtter qýyp jetip, qan-josa etip talaı bastapty. Sol kezde kólikpen ótip bara jatqan aýyl turǵyny jaǵdaıdy baıqap, dereý bákisin ala júgirgen. Jalǵyz ózi arasha túsip, ıttermen alysyp júrip, balany ólim aýzynan alyp qalǵan eken.
"Qanǵa qaqalyp jatyr eken. Meni kórdi de, "Aǵa, kómektesińizshi!" dedi. Ul bala eken. Amalsyz pıtbýlge soqqy berýge týra keldi. Soqqy jasadym, biraq ıt maǵan tap berdi de, sekirip ketti. Al ovcharka balany bermeı qoıdy, tipti ıyǵynan súırep bara jatyr. Sodan balanyń ústinen sekirip ótip, ovcharkany pyshaqpen urdym. Ol bir jaǵyna qashyp ketti. Sosyn balanyń anasy júgirip keldi", - dedi Jalpaqsaı aýylynyń turǵyny Serik Saqabekov.
Bul oqıǵa balanyń anasy úshin aýyr soqqy boldy. Oqıǵa ornyna jetkende ol Mıhaıldyń qulaǵy julynyp, jerde qansyrap jatqanyn kórip shoshyǵan.
"Balam ıtterdi baıqamaı qalǵan ǵoı. Olar ústine shyǵyp, Mıhaıldy julmalaı bastaǵan. Men kelsem ústi-basy qan-josa bolypty. Óte aýyr. Aýrýhanaǵa jetkenshe esin joǵaltpas úshin sóılep bardym. Birden ota jasady. Al álgi ıttiń ıeleri balamdy buzyq dep, sol ıtterge ózi barǵandaı jala jaýyp otyr", - dedi zardap shekken balanyń anasy Ekaterına Býrmıstrova.
Kýágerler ıt ıeleriniń de áreketi jaǵa ustatty deıdi. Olar balany ajal aýzynan alyp qalyp, tóbetterdi toqtatqan aýyl turǵynyna shúıligipti. Itke pyshaq jaraqatyn salǵany úshin Mıhaıldy qutqaryp qalǵan azamattan ótemaqy talap etken kórinedi.
"Tańerteń ıtterdiń ıesi habarlasyp, maǵan "Eki ıttiń aqshasyn tóleısiń, olar – qymbat turatyn ıtter" deıdi. Sonda men ne isteýim kerek edi? Itteriń qymbat eken dep qarap turýym kerek pe? Balany óltirip jatsa da toqtamaı, tek qarap turaıyn ba? Óıtkeni ıtteri qymbat eken, onyń áreketi durys pa sonda?!", - dep ashyndy Jalpaqsaı aýylynyń turǵyny Serik Saqabekov.
Balany bas salǵan ıtter shyqqan ǵımaratqa qatysty da kúmán kóp. Qujat júzinde bul — burynǵy mádenıet úıi. Biraq is júzinde 20 jyldan asa munda túrli táýeldilikten emdeıtin ortalyq jumys isteıdi eken. Aýyl turǵyndary bul jerdi ózara “sekta” dep atap ketken. Óıtkeni aýlasy ıtke toly, al ǵımarattan túsiniksiz dybystar jıi estiletinin aıtady. Okrýg ákimdigi bul nysanǵa arnaıy tekseris júrgiziletinin málimdedi.
"Buǵan deıin eshqandaı másele bolmaǵandyqtan, kúdigimiz de bolǵan joq. Bul jaǵdaıǵa baılanysty mekeme basshysymen arnaıy sóılesken joqpyz. Oqıǵadan keıin bul azamattardyń jumysynyń tártibi men zańdylyǵy, sondaı-aq ıt ustaý quqyǵy qanshalyqty zańǵa sáıkes ekeni anyqtalady. Veterınarlyq stansıa men SES tarapynan tekseris júrgizilip, tıisti sharalar atqarylady", - dedi Umtyl aýyldyq okrýginiń ákimi Islam Ibatjan.
Balaǵa shapqan ıtterdi baqqan mekemeniń ókili bul jaǵdaıǵa ózin kináli sanamaıtynyn ashyq aıtty. Kerisinshe, jetkinshek "jeke aýmaqqa ruqsatsyz kirip ketken" dep otyr. Biraq Mıhaıl fýtbol alańynan tabylǵan. Muny ıttiń ıeleri túsindirip bere almady.
"Bul balalar bizdiń ortalyqtyń aýmaǵyna ózderi kirdi. Vıdeosy bar. Al jedel járdem kelgende ony alańǵa qaraı súırep alyp shyqty. Turǵyndardyń sózi shyndyqqa janaspaıdy. Bizde 4 úlken ıt, 2 kúshik bar. Onyń ekeýin óltirdi. Itterdi ózimiz úshin baǵamyz", - dedi ońaltý ortalyǵynyń ókili.
Oqıǵaǵa qatysty Polısıa departamenti qylmystyq is qozǵap, tergeý bastalǵanyn aıtty. Qazir Mıhaıl Qaskeleń qalasyndaǵy travmatologıa bóliminde jatyr. Oǵan aldaǵy ýaqytta birneshe operasıa jasalady. Jaǵa ustatarlyq jaıttan keıin aýyldaǵy aǵaıyn buralqy ıtter máselesin kóterip, janýarlardy tıisti mekemelerdiń aýlaýyn surap otyr.
