Qonaev qalasy ákimdiginiń málimetinshe, №6 jaǵajaıda 40 kásipkerlik nysan jumys isteıdi. Barlyǵy senimgerlik basqarýshy kompanıamen kelisimshart jasap, jalǵa alǵan aýmaqty kútip ustaý boıynsha naqty mindettemelerdi alǵan. Olar kún saıyn tazalyq jumystaryn júrgizýge, tapshandardy dezınfeksıalaýǵa, qoqys jáshikteri men jaryq ornatýǵa, sondaı-aq qaýipsizdikti qamtamasyz etýge mindetti.

«№6 jaǵajaıda 45 qoqys jáshigi, 10 konteıner jáne úsh ájethana ornatylǵan. Tazalyqqa 30 jumysshy men 2 arnaıy tehnıka jaýapty. Qaýipsizdikti 10-nan astam qutqarýshy qamtamasyz etip otyr, medısına qyzmetkerleri kezekshilik etedi, beınebaqylaý kameralary ornatylǵan. Monıtorıń kún saıyn júrgiziledi», — dep habarlady qalalyq TÚKSH bólimi.

Al №5 jaǵajaıda 28 bólmeli 6 ájethana, 5 jýyný orny, 6 kıim aýystyratyn bólme, 30 qoqys jáshigi, 40 bóshke jáne 25 konteıner bar. Munda jasandy ıntellektpen jabdyqtalǵan beınebaqylaý júıesi ornatylǵan.

Jaǵajaı aýmaǵynda tártipti saqtaý jáne tótenshe jaǵdaılardyń aldyn alý maqsatynda TJB men polısıa qyzmetkerleri turaqty túrde kezekshilik atqarady.

Kún saıyn №6 jaǵajaıǵa 4–5 myń adam, al №5 jaǵajaıǵa 1 500–2 000 adam keledi. Demalys kúnderi bul kórsetkish ár jaǵajaıda 2–3 esege deıin artady.

«Ár demalys saıyn otbasymyzben №5 jaǵajaıǵa kelemiz — meniń úsh balam jáne eki jıenim bar. Munda taza, qaýipsiz, eresekter men balalarǵa barlyq jaǵdaı jasalǵan. Kıim aýystyratyn bólmeler, qutqarýshylar men medqyzmetkerler bar. Balalarǵa oınaıtyn alań bolsa, biz úshin tazalyq pen tártip mańyzdy. Qoqystardy arnaıy jáshikterge tastaý – bul mádenıettilik belgisi», — deıdi almatylyq turǵyn Murat Amangeldıev.

Qaýipsizdik boıynsha sanıtarlyq qyzmet mamandary pikir bildirdi. Sanıtarıalyq-epıdemıologıalyq baqylaý basqarmasynyń basshysy Narıman Orynbasarulynyń aıtýynsha, Qapshaǵaı sý qoımasynan aı saıyn sý synamasy alynyp, zerthanalyq saraptamalar júrgiziledi. Qorytyndysy - qanaǵattanarlyq, sý sanıtarlyq talaptarǵa saı keledi, shomylýǵa ruqsat berilgen.

Jaǵajaı maýsymy bastalǵaly qoǵamdyq oryndardy lastaǵany úshin QR ÁQBtK 434-2-baby boıynsha 35 ákimshilik hattama toltyrylyp, azamattarǵa jalpy somasy 1 376 200 teńge aıyppul salynǵan.

Qala ákimdigi jaǵajaıdaǵy sanıtarlyq talaptardyń saqtalýyna baqylaý kúsheıtilgenin atap ótti. Kelisimshart talaptaryn oryndamaǵan kásipkerler jaýapkershilikke tartylady, sondaı-aq demalýshylar da tazalyq pen tártipti saqtaýǵa jaýapty ekenderin esten shyǵarmaýy qajet.