Fılologıa ǵylymdarynyń doktory, profesor, jazýshy Káken Qamzın qartaıǵan shaǵynda jalǵyz úıinen aırylmaq, dep habarlaıdy bairaqmedia.kz.

PR mamany Aıbar Oljaevtyń jazýynsha, alaıaqtar ardager jýrnalıs, profesordyń sengishtigin paıdalanyp kınodaǵydaı áreket etken. Aldymen, «Energosbyt» adamdary retinde habarlasyp, meken jaıy, JSN, páteri týraly aqparatty bilip alǵan. Artynan Ulttyq qaýipsizdik komıtetiniń atyn jamylyp habarlasyp, bireýlerdiń úıin tartyp alaıyn dep turǵanyn aıtyp, tez úıin satýǵa kóndirip, al aqshany Ulttyq banktiń arnaıy shotynda saqtaısyz dep aldaǵan. Profesor notarıýs arqyly úıin satyp, aqshany alaıaqtar jibergen kýrerge bere salǵan.

Aıbar Oljaev osy máselege qatysty birqatar salalyq mamandardy profesorǵa qol ushyn berýge shaqyrdy. 

«Qazir Almaty qalasy Áýezov aýdandyq polısıa departamentinde qylmystyq is qozǵaldy. Almaty qalasynyń Polısıa departamenti osy rezonansty iske barynsha jumylýdy suraımyn. İshki ister mınıstri, qurmetti Erjan Sadenov osy isti jeke baqylaýǵa alsańyz nur ústine nur bolar edi. Sot arqyly úıdi satý mámilesin zańsyz dep taný úshin advokattardyń kómegi kerek. Syılaıtyn aǵamyz Abzal Quspan kásibı keńes berse úlken kómek bolady. Parlament depýtattary, profesor shákirtteri Janarbek Áshimjan, Nartaı Sarsengalıev, Maqsat Tolyqbaı, arda jýrnalıs Ermýrat Bapı  osy isti nazarǵa alyp, úlken rezonans týǵyzsa profesordy qorǵaı alamyz. Dál qazir Káken Qamzın jalǵyz, úıinde barıkada quryp bekinip jatyr. Páterdi satyp alǵandar keshke, túnde kelip qoqan-loqqy kórsetýde. İs nasyrǵa shaýyp barady», - dep jazdy ol.