Májilis depýtaty Samat Nurtaza áleýmettik jelidegi paraqshasynda áriptesterimen birge Astanadaǵy LRT-ge barǵanyn aıtty. Kompanıa ókilderi ekskýrsıa uıymdastyryp, suraqtarǵa jaýap berdi, dep habarlaıdy Azattyq Rýhy.
LRT basshylary bir top depýtat - Dúısenbaı Turǵanov, Pavel Kazansev, Marat Bashımov, Tatána Saveleva, Snejanna Imashevany qarsy alyp, esep berdi.
Samat Nurtazanyń aıtýynsha joba quny 1 mıllıard 880 mıllıon dollar turady.
«Beketterdiń sany –18. Olardyń arasyndaǵy qashyqtyq ár qıly, 400 metrden 2 kılometrge deıin. Beketterde eskalator men lıftter qarastyrylǵan. Bir quramanyń ishinde 4 vagon, bir-biriniń arasy ashyq. Qurama sany - 19 dana. Poıyzdardyń araqashyqtyǵy 2-4 mınýt dep josparlanyp otyr», - dep jazdy depýtat.
Ol vagondardyń sapasy jaqsy ekenin, otyratyn oryndyqtar London men Máskeýdegideı plasmassa emes, jumsaq materıaldan jasalǵanyn atap ótti.
«Áýejaı - Nurly Jol Vokzal» degen marshrýt tolyq aıaqtalyp, iske qosylǵan soń, LRT tarmaǵyn «Qosshy» men «Ilınka» jaqqa (Jaǵalaý arqyly) qaraı sozý josparlanyp otyr. Qytaıdyń ınjenerleri bárin ólshep, barlyǵyn testileýden ótkizeıin dep jatyr eken. Ásirese qysta qalaı júredi? Qysta esik qatyp qalmaı ma? Jazdyń ystyǵynda rels keńeımeı me? Tótenshe jaǵdaıda vagon ishindegi plasık synyp ketpeı me? Sodan keıin ǵana baryp, Qazaq LRT jobasyna kepilin beredi eken», - dep tolyqtyrdy Nurtaza.
Onyń aıtýynsha ár poıyzda bir qadaǵalaýshy adam otyrady. Ol poıyzdy júrgizbeıdi, jaı kúzetshi-kómekshi-baqylaýshy sıaqty fýnksıalar atqarady. Ár bir vagonnyń ishi-syrty qazaqı nyshanda oıýlanǵan.
LRT jolyn ustap turǵan baǵanalar jarnama úshin jalǵa berilip, ol qarajat ta LRT ákimshiliginiń temirjoldy baptap-qadaǵalaýǵa ketetin qarajatyna demeý bolmaq.
«Bılet quny 200 teńge bolady dep josparlanýda. Biraq ol sheshim áli naqty emes», - dep atap ótti depýtat.
Sonymen qatar vagondardy jýatyn, tazalaıtyn depo salynyp jatyr. Ol jerde barlyq jumysty robottar atqarady, adam balasy aralaspaıtyn proses. Tún saıyn 19 squrama (76 vagon) jýylady.
Poıyzdar tańǵy saǵat 06:00 men 23:00 arasynda qatynamaq. LRT jolynyń boıyndaǵy úılerdiń turǵyndary poıyzdardyń 24 saǵat júrýine qarsylyq tanytqan.
