Almaty oblysynda balyq sharýashylyǵy damýdyń jańa kezeńinde Balyq sharýashylyǵy – agrarlyq sektordyń keleshegi zor salalarynyń biri. Búginde bul baǵyt Almaty oblysynda belsendi damyp keledi. Memlekettik qoldaý, júıeli tásil jáne bıznes ókilderiniń qatysýy arqasynda óńir akvakýltýranyń qazaqstandyq ortalyqtarynyń birine aınalý jolynda nyq qadam jasaýda.
2025 jyly oblysta balyq sharýashylyǵyn jańǵyrtýǵa, óndiris kólemin arttyrýǵa, ónim sapasyn jaqsartýǵa jáne sý resýrstaryn utymdy paıdalanýǵa baǵyttalǵan keshendi is-sharalar júzege asyrylýda. Bul baǵyttaǵy qarjylyq negizdi óńirlik búdjet qalyptastyryp otyr — bıyl salany damytýǵa 500 mıllıon teńge bólindi.
Onyń 300 mıllıon teńgesi akvakýltýrany damytýǵa: sharýashylyqtardyń ónimdiligin arttyrýǵa, balyq ósirý isine zamanaýı tehnologıalardy engizýge jáne tuqymdyq jumysty qoldaýǵa baǵyttaldy. Jyldyń birinshi jartysynda 169 mıllıon teńgeden astamy ıgerildi.
Qalǵan 200 mıllıon teńge – balyq sharýashylyǵy sýbektileriniń ınvestısıalyq shyǵyndaryn ishinara óteýge arnalǵan. Mundaı tásil kásipkerlerdi balyq sharýashylyqtaryn salýǵa, keńeıtýge, jańa óndirister ashýǵa jáne jabdyqtardy jańǵyrtýǵa yntalandyrady.
Óńir kózdegen maqsat – bıyldyń sońyna deıin 6,5 myń tonna taýarlyq balyq óndirý. Al 2030 jylǵa qaraı bul kórsetkishti 20 myń tonnaǵa jetkizý kózdelgen. Qazirgi aralyq nátıjeler bul maqsattyń naqty jáne qoljetimdi ekenin kórsetedi.
2025 jyldyń ortasyna qaraı oblysta 4 488 tonna balyq ósirildi, onyń jartysyna jýyǵy – 2 myń tonnadan astamy – eksportqa shyǵarylǵan. Bul kórsetkishter oblystyń joǵary óndiristik áleýetin ǵana emes, sonymen qatar qazaqstandyq balyq ónimderine shetelde de suranys artyp kele jatqanyn dáleldeıdi.
Óńirde qazirgi tańda jumys isteıtin 42 taýarlyq balyq sharýashylyǵy bar.
Sý aıdyndaryn balyqtandyrýǵa da erekshe kóńil bólinýde. 2025 jyly bul maqsatqa 40 mıllıon teńge qarastyrylǵan. Kúzde jarty mıllıonǵa jýyq shabaq sýǵa jiberiledi dep josparlanyp otyr. Bul — bıoalýantúrlilikti saqtaý jáne sý resýrstarynyń turaqtylyǵyn qamtamasyz etý úshin mańyzdy qadam.
Almaty oblysy balyq sharýashylyǵynyń bolashaǵyn ornyqty, ekologıalyq turǵydan saýatty jáne ekonomıkalyq turǵydan tıimdi sala retinde kóredi. Óńir ınvestısıalyq bastamalardy qoldaýdy, akvakýltýranyń ozyq ádisterin engizýdi, eksporttyq áleýetti arttyrýdy jáne sý resýrstaryn basqarýda ǵylymı tásildi kúsheıtýdi jalǵastyrady.
Balyq sharýashylyǵy – agrarlyq saıasattyń bir bóligi ǵana emes, sonymen birge oblys ekonomıkasynyń ósý núktesine aınalyp keledi. Bul sala aýyldyq jerlerde bızneske jańa múmkindikter ashyp, jumys oryndaryn qurýda mańyzdy ról atqarady.
