Abaı oblysy, Aqsýat jerinde dástúrli «Asyl besik – Aqsýat» respýblıkalyq sport jáne óner festıvali ótti, dep habarlaıdy bairaqmedia.kz
Aıtýly is-sharanyń avtory – kásipker, mesenat, el janashyry Dýlat Tastekeı. Festıválge Abaı oblysynyń ákimi Berik Ýálı qoldaý bildirip, aýdan ákimi Ersin Kádirbekuly bastaǵan el azamattary jumyla at salysqan.
Qasıetti Qurban aıt merekesimen qatar kelgendikten aldymen Aqsýattaǵy Yrǵyzbaı Dosqanaulynyń kesenesinde 500 adamǵa quran oqytylyp, qurbandyq shalyndy. Festıvál shymyldyǵy aýdandyq teatr ónerpazdarynyń ónerimen ashylyp, keıin 30 adamnan quralǵan «Qazaqsha terapıa» teatrlandyrylǵan án-jyr keshiniń óneri tamashalandy.
Oblys ákimi Berik Ýálı saltanatty sóz sóılep, elge qyzmet etýdiń Abaı elindegi basty murat ekenin atap ótti. Ol týǵan jerge janashyr azamattardyń qoldaýyn úlgi etip, barsha kásipkerlerdi týǵan ólkege tirek bolýǵa shaqyryp, aýdanǵa 2 mektep, mádenıet úıi jáne 2 sport kesheniniń salynatyndyǵyn da aıtty. Sondaı-aq, Ekpin aýylynda 250 -300 oryndyq “ADAL HALL” qabyldaý úıiniń saltanatty ashylý rásimi ótti.
Ulttyq sport túrlerinen uıymdastyrylǵan saıystar kórermenniń rýhyn kóterdi. «ASSYL ARLAN» respýblıkalyq qazaq kúresi týrnırinde jeńimpaz atanǵandarǵa avtokólik pen qomaqty qarjylaı syılyqtar tabystaldy. Temir tulparǵa ıe bolǵan balýandar: Nurdáýlet Baqtybaıuly (Shymkent) jáne Ádil Orazbaev (Abaı oblysy).
Sondaı-aq, Aqsýattyń týmasy, sportshy Meıirjan Bereketke de avtokólik kilti tabystaldy. Bul – el sportshylaryna kórsetilgen qurmettiń aıqyn úlgisi boldy.
Naǵyz sáıgúlikter saıysyna aınalǵan «ASSYL TULPAR» báıgesinde - qunan, top, alaman báıgelerde eldiń ár óńirinen kelgen júırikterdiń baǵy men baby synǵa tústi.
Úsh kúnge sozylǵan festıvál Uly Abaıdyń 180-jyldyǵyna oraı ashyq aspan astyndaǵy 50-adamnan quralǵan «Asyl tas» teatrynyń “Abaı álemi” atty áserli qoıylymymen jalǵasyp, al sharyqtaý shegi Y.Dosqanauly atyndaǵy ortalyq stadıonda ótken gala-konsertke ulasty. Bul keshte qazaq estradasynyń jaryq juldyzdary – Maıra İlıasova, Qýandyq Rahym, Móldir Áýelbekova, Ulyqpan Joldasov, Raim, Albına Shardarova, Baǵlan Ábdiraıymov, Aınur Saǵıqyzy, Jandos Qarjaýbaı, «Alataý serileri», Aposh Sarbaz, Serik Isahan, Qadylbek Marjan syndy ónerpazdar Aqsýat aspanyn ásem ánmen terbetti.
«Asyl besik – Aqsýat» festıvali – bul tek mádenı-sporttyq shara emes, bul – elge degen súıispenshiliktiń, aýylǵa degen qurmettiń, jastarǵa jol silteıtin naqty árekettiń kórinisi. Elge shyn janashyr azamattardyń uıytqy bolýymen ótken bul shara – ult birliginiń, urpaq sabaqtastyǵynyń jáne rýhanı jańǵyrýdyń jarqyn úlgisi boldy.
