Memleket basshysy Qasym-Jomart Toqaev mádenıet jáne óner qyzmetkerlerin marapattaý rásiminde sóz sóıledi, dep habarlaıdy Bairaqmedia.kz.
Mádenıet jáne óner qyzmetkerleriniń kásibı merekesi qarsańynda Aqordada saltanatty jıyn ótti. Prezıdent ultymyzdyń bolmys-bitimin saqtaýǵa, halqymyzdyń rýhanıatyn baıytýǵa zor úles qosyp júrgen sala qyzmetkerlerine rızashylyǵyn bildirdi.
Mádenıet – ulttyń tólqujaty. Jahan jurty elimizdi, eń aldymen, ónerimiz arqyly tanyp biledi. Biz – Uly dalada tamyr jaıǵan biregeı mádenıettiń zańdy muragerimiz. Qazaq jerinen shyqqan qaıtalanbas óner ıeleriniń teńdessiz týyndylary tutas ultty tárbıeledi. Qazir tól mádenıetimiz dúnıe júzine tanylyp jatyr. Talantty mýzykanttarymyz álemdik sahnalarda tabysty óner kórsetip júr. Qazaq kınogerleri túrli halyqaralyq baıqaýlarǵa qatysyp, sarapshylardyń joǵary baǵasyna ıe bolýda. Elordamyzda Dúnıejúzilik kóshpendiler oıyndary tabysty ótti. Aqtaý qalasy túrki áleminiń mádenı astanasy bolyp jarıalandy. Rýhanı muralarymyz sıfrlyq formatqa kóshirile bastady. Taıaýda ultymyzdyń bir jarym myń án-kúıi men fólklorlyq murasy eń tanymal halyqaralyq platformalarǵa salyndy. Tól ónerimiz kreatıvti ındýstrıa arqyly barynsha nasıhattalýda, – dedi prezıdent.
Qasym-Jomart Toqaevtyń aıtýynsha, memleket óner salasyn órkendetýge árdaıym erekshe mán beredi. Óıtkeni mádenıeti ozyq eldiń rýhy bıik bolady.
Byltyrdyń ózinde 45 jańa mádenıet nysany salyndy. Bul jumys bolashaqta da jalǵasyn tabady. Teatr – rýhanıatymyzdyń negizgi tireginiń biri. Ulttyq quryltaıdyń Býrabaıda ótken otyrysynda aımaqtaǵy teatrlardy damytý týraly naqty tapsyrma berildi. Teatrlardyń kópshiligi tolyq jańǵyrtýdy qajet etedi. Keıbirine jańa ǵımarat kerek. Osy jumysqa kásipkerler men mesenattardy jumyldyrǵan abzal. Bul – álemde keń taralǵan tájirıbe. Mundaı jobalarǵa ınvestısıa salýǵa daıyn azamattar az emes. Men bıznes ókilderin rýhanıatymyzdy damytý isine atsalysýǵa shaqyramyn, – dedi memleket basshysy.
Prezıdent elimizde irgeli mádenıet oshaqtary kóp ekenine nazar aýdaryp, olar talaı jyldan beri kórermen qaýymǵa taǵylymdy qoıylymdar usynyp kele jatqanyn jetkizdi.
Osy oraıda Bıken Rımova atyndaǵy qazaq drama teatryna, Almaty qalasyndaǵy Memlekettik qýyrshaq teatryna jáne Ǵarıfolla Qurmanǵalıev atyndaǵy fılarmonıaǵa akademıalyq mártebe berý qajet dep sanaımyn. Bul qadam mádenıet mekemeleriniń jumysyna tyń serpin bereri sózsiz, – dedi memleket basshysy.
