Úkimet Jezqazǵan qalasynyń jylý jelilerin rekonstrýksıalaý men jańǵyrtýǵa 2,8 mlrd teńgeden astam qarjy bóldi, dep habarlaıdy Bairaqmedia.kz. Premer-mınıstr Oljas Bektenov tıisti qaýlyǵa qol qoıdy.

Jezqazǵan qalasy jylý jelileriniń uzyndyǵy – 398 shaqyrym. Nysan 1951 jyly paıdalanýǵa berilgen, tozýy – 56,6%. Jylý jelileri sehynda 1969 jyly iske qosylǵan 8 sorǵy stansasy bar. Jylytý maýsymynda jylý jelileriniń tozýy jylýmen qamtýǵa keri áserin tıgizýde. Resýrstardyń aıtarlyqtaı shyǵyny orta eseppen 35-40%-ǵa jetedi, bul qoldanystaǵy jáne salynyp jatqan nysandardy jylý jelilerine qosýǵa múmkindik bermeıdi.

Qalanyń keńeıýin jáne salynyp jatqan jańa Batys aýdanyn jylýmen qamtamasyz etý qajettiligin eskere otyryp, bastapqy joba túzetildi: qubyrlardyń dıametri 800 mm-den 1000 mm-ge deıin, al rekonstrýksıalaýǵa jatatyn jelilerdiń uzyndyǵy 11,4 shaqyrymnan 12,3 shaqyrymǵa deıin ulǵaıtyldy.

 Úkimet rezervinen bólingen 2,8 mlrd teńge jobany aıaqtaýǵa jáne 98 myńnan astam turǵyny bar qalanyń jylý jelilerin sapaly daıyndaýǵa múmkindik beredi.