Respublica partıasynyń teń tóraǵasy retindegi mısıasyn aıaqtaǵan Rýslan Berdenov málimdeme jasady, dep habarlaıdy bairaqmedia.kz
Qastandyq qurbany bola jazdaǵan sheneýniktiń aıtýynsha, bul sheshimdi ózi sanaly túrde qabyldaǵan. Buǵan birneshe sebep bar eken.
Qurmetti áriptester, qadirli seriktester! Men Respublica partıasynyń teń tóraǵasy retindegi mısıamdy aıaqtaý jóninde sheshim qabyldaǵanymdy habarlaımyn. Bul sheshim sanaly túrde jáne ózime qatysty birqatar obektıvti sebepterge baılanysty qabyldandy. Birinshiden, belgili bolǵandaı, qazirgi ýaqytta men Shymkent qalasy ákiminiń orynbasary qyzmetin atqaryp kelemin. Qoldanystaǵy zańnama talaptaryna sáıkes, memlekettik qyzmetti saıası partıadaǵy jetekshilik qyzmetpen qatar alyp júrýge jol berilmeıdi. Men zań talaptaryn qurmetteımin jáne ony qatań saqtaımyn. Ekinshiden, partıanyń ishki qaǵıdattaryna sáıkes, partıa músheleri memlekettik organdarda laýazymdy qyzmet atqara almaıdy. Biz saıası úderisterge qatysý partıa ishindegi bılik qurylymymen aralaspaýy tıis dep sanaımyz. Úshinshiden, qazirgi tańda óz densaýlyǵymdy qalpyna keltirýge basa nazar aýdaryp júrmin. Men árdaıym jumysyma joǵary jaýapkershilikpen qarap keldim, budan keıin de memlekettik qyzmettegi laýazymymdy óz deńgeıinde atqarýym kerek. Sondyqtan da dál qazir ózimdi jaqsy seziný úshin kúsh-qýatymdy soǵan salýdamyn, - dep jazdy Rýslan Berdenov.
Aıta ketsek, 21 sáýir kúni sheneýnik ákimdik ǵımaratynan shyqqan sátte Berdenovtiń burynǵy qaramaǵyndaǵy qyzmetkeri bes ret oq atqan. Osy shabýylǵa qatysty tergeýdiń aıaqtalǵany da búgin málim boldy.
