Qazaqstanda 2026 jyldan bastap er balalarǵa adam papıllomasy vırýsyna qarsy vaksına egý kózdelip otyr. Bul týraly Densaýlyq vıse-mınıstri Tımýr Sultanǵazıev málimdedi, dep habarlaıdy Bairaqmedia.kz.

Ótken jyly qyz balalarǵa adam papıllomasy vırýsyna (APV) qarsy ekpe egýdi bastadyq. Bul dert óte qaýipti, ıaǵnı jatyr moıny obyry jáne basqa da onkologıalyq aýrýlarǵa ákelýi múmkin. Qazir Úkimette vaksınany er balalarǵa da egý máselesi qarastyrylyp jatyr. Aldyn ala jospar boıynsha, shamamen bir jyldan keıin bul jumysty bastaý kózdelip otyr, – dedi Tımýr Sultanǵazıev.. 

Sondaı-aq vıse-mınıstr adam papıllomasy vırýsyna qarsy ekpe alatyn qyzdardyń jas sanatyn keńeıtý josparlanyp otyrǵanyn aıtty.  

Bizdiń strategıamyz – qyz balalardy barynsha qamtý. Qyzdardy jáne aldaǵy ýaqytta uldardy da qamtý úshin vaksınasıalaý deńgeıin 90 paıyzǵa deıin jetkizý kerek. Jyl sońyna deıin 90 paıyzdyq mejege jetýdi josparlap otyrmyz. Keıin kezeń-kezeńimen ekpe alatyn top qataryn keńeıtemiz, ıaǵnı aldymen qyzdar arasynda, odan keıin er balalarǵa da engizemiz, – deıdi vıse-mınıstr. 

Aıta ketsek, ótken jyly Úkimet adam papıllomasy vırýsyna qarsy vaksına satyp alýǵa 9,7 mlrd teńgeden astam qarjy bóldi.