2025 jylǵy maýsym aıynda Jambyl oblysynda «Aqbaqaı» ken ornynda zańsyz altyn óndirip, óńdeýmen jáne tasymaldaýmen aınalysqan uıymdasqan qylmystyq toptyń áreketi áshkerelendi. Bul týraly İİM uıymdasqan qylmysqa qarsy kúres departamentiniń ókili Qýandyq Alpys málimdedi, dep habarlaıdy Bairaqmedia.kz.

Arnaıy operasıany polısıa departamentiniń uıymdasqan qylmysqa qarsy kúres basqarmasy oblys prokýratýrasymen birlesip júrgizdi. Top quramyna jergilikti turǵyndar, kombınattyń keıbir qyzmetkerleri men qaýipsizdik qyzmetiniń ókilderi kirgen.

Zańsyz áreketterdiń saldarynan kásiporynǵa 400 mıllıon teńgeden astam zalal kelgen. Arnaıy operasıa bir mezgilde eldiń tórt óńirinde ótti, nátıjesinde 50-den astam adam ustaldy. Jedel izdestirý sharasy barysynda 6 keli altyn tárkilenip, ken óńdeýge arnalǵan 8 jasyryn seh joıyldy.

Qazir qylmystyq is birneshe bap boıynsha tergelip jatyr. Olardyń qatarynda uıymdasqan qylmystyq top qurý, oǵan basshylyq etý jáne qatysý faktileri bar.

Sonymen qatar, altyn kontrabandasynyń arnalary, kóleńkeli aınalym jáne túpkilikti benefısıarlar anyqtalyp jatyr.