Qasym-Jomart Toqaev Bolgarıa Prezıdenti Rýmen Radevpen kelissóz júrgizdi, dep habarlaıdy Bairaqmedia.kz.

Qasym-Jomart Toqaev Bolgarıa – Qazaqstannyń Eýropadaǵy eń mańyzdy seriktesteriniń biri ekenine basa nazar aýdardy.

Eki eldi tamyry tereń saıası jáne ekonomıkalyq yntymaqtastyq baılanystyrady. Ártúrli saladaǵy ekijaqty qarym-qatynastarymyz turaqty damyp keledi. Muny senimdi saıası dıalogtan, parlamentter arasyndaǵy nátıjeli yqpaldastyqtan, saýda men ınvestısıanyń qarqyndy ósýinen, halyqtarymyzdyń baılanysy men álemdik qoǵamdastyqtaǵy ózara qoldaýdan anyq ańǵarýǵa bolady. Ekijaqty saýda aınalymynyń artyp kele jatqany qýantady. Bul jaqsy úrdis. Bizdiń naryqta 60-qa jýyq bolgar kompanıasy tabysty jumys istep jatyr. Qazirgi ýaqytta biz taý-ken ónerkásibi, óndiris, kólik jáne qurylys salalarynda jemisti yntymaqtastyq ornattyq. Energetıka, transport jáne logıstıka, jasyl energıa, atom ónerkásibi, ǵarysh, aýyl sharýashylyǵy, sıfrlandyrý, densaýlyq saqtaý, týrızm sekildi perspektıvti salalar boıynsha yqpaldastyqtyń áleýeti zor, – dedi Qazaqstan prezıdenti.

Óz kezeginde Rýmen Radev Bolgarıa eki el arasyndaǵy dástúrli ári tabysty baılanysty joǵary baǵalaıtynyn atap ótti.

Bolgarıa eki el arasyndaǵy dástúrli ári tabysty baılanysty joǵary baǵalaıdy. Memleketińizdi órkendetýge baǵyttalǵan aýqymdy reformalaryńyz ben kóregen saıasatyńyzdy qoldaımyn. Biz Qazaqstandy Ortalyq Azıadaǵy basty seriktesimiz sanaımyz. Sizderdiń osyǵan deıingi tabystaryńyz tańǵalarlyq: ekonomıkalaryńyz qarqyndy ósip keledi, ınovasıa, ǵylym, bilim, joǵary tehnologıa salalarynda zor tabysqa jettińizder. Keshe men Ǵarysh ortalyǵyn aralap kórdim. Sizderdiń jetistikterińizden jaqsy áser aldym, – dedi Bolgarıa prezıdenti.