2025 jylǵy 16 sáýirdegi Syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komısıanyń sheshimimen mal terisi men júnin eksporttaýǵa salynatyn kedendik baj salyǵyn alyp tastaý maquldandy. Bul jeńildik úsh jyl merzimge engizilip, keıin qaıta qaraý múmkindigi saqtalady, dep habarlaıdy Bairaqmedia.kz.

Sheshimniń basty sebebi — óndiriletin shıkizattyń edáýir bóligi ishki naryqta suranysqa ıe emes. Atap aıtqanda, teri men júndi óńdeý jáne eksporttaý deńgeıi áli de tómen deńgeıde qalyp otyr.

Aýyl sharýashylyǵy taýaryn óndirýshilerdi yntalandyrý jáne óńdeý kásiporyndarynyń júktemesin qamtamasyz etý maqsatynda, óńdeýge ótkizilgen shıkizatqa sýbsıdıa berý túrinde memlekettik qoldaý sharalary qarastyrylyp jatyr.

Teri men júnge salynatyn eksporttyq baj salyǵyn alyp tastaý, eń aldymen, iri jáne usaq mal ósiretin fermerlerdiń shyǵyndary men qaldyqtardy joıýǵa jumsalatyn shyǵystardy azaıtýǵa, óndiristik-bólý tizbekterin damytýǵa, ótkizý naryqtaryn keńeıtýge, sondaı-aq aýyl sharýashylyǵy shıkizatyn óndirýshi jáne eksporttaýshy otandyq kásipkerlerdiń básekege qabilettiligin arttyrýǵa yqpal etedi.

Qazir Ulttyq ekonomıka mınıstriniń 2016 jylǵy 27 aqpandaǵy buıryǵyna sáıkes, qoldanystaǵy eksporttyq baj salyǵy mólsheri mynadaı:

•iri jáne usaq mal terileri men basqa da óńdelmegen terilerdiń eksportyna — tonnasyna 200 eýro;

•jún eksportyna — 10%, biraq tonnasyna keminde 50 eýro.

İshki naryq qajettiligi men teri-jún eksporty arasyndaǵy teńgerimdi saqtaý maqsatynda Aýyl sharýashylyǵy mınıstrligi jaǵdaıdy turaqty baqylaýda ustap otyrady jáne qajet bolǵan jaǵdaıda óńdeý salasyndaǵy ınvestısıalyq jobalardy eskere otyryp, tıisti sharalardy jedel túrde qabyldaıdy.