Jetisý oblysynyń Aqsý aýdanyna qarasty Balasaz aýylynda 32 jastaǵy Aızat Jumanovany kúıeýi qatygezdikpen óltirgen, dep habarlaıdy bairaqmedia.kz.

Qylmys 21 maýsym túni bolǵan. Qandy qylmysty marqumnyń jubaıy Aıbar Janbolat jasady degen kúdik bar. Jelide taraǵan málimetke júginsek, marqumnyń týystary kóp saǵat boıy azaptalǵanyn aıtady. Kúıeýi áıelin eki jasar búldirshininiń kózinshe qatygezdikpen uryp-soqqan. Budan bólek, ony arqanmen qolynan baılap, jylqymen súıregeni de aıtyldy.

«Aqsý aýdanyna qarasty Balasaz aýylynda turatyn sińlim Aızat Maratqyzy 21 maýsymnan 22 maýsymǵa qaraǵan túni kúıeýiniń soqqysynan kóz jumdy. Kúıeýbala ony kórshisiniń kóligimen Sýyqsaı aýylyndaǵy ata-anasynyń úıine aparǵan. Keıin Jansúgir kentindegi aýdandyq aýrýhanaǵa jetkizgen. Alaıda onda jóndeý jumystary júrip jatqandyqtan, Taldyqorǵandaǵy kópsalaly aýrýhanaǵa alyp barǵan», – deıdi ápkesi Raýshan Dárimbekova.

Onyń aıtýynsha, qoldarynda dáriger qorytyndysy bar.

«Qorytyndyǵa sáıkes, emdeý mekemesine jetkizilgen kezde púlsi soqpaǵan, qan qysymy bolmaǵan – bári nól. Soǵan qaramastan «komada jetkizildi» dep jazyp qoıǵan. Aýrýhana eshqandaı naqty aqparat bermeı otyr. Erteńinde enesi kelip, qaraly habardy jetkizdi. Aızattyń «joǵarǵy qabattan qulap ketkenin» aıtty. Biraq biz buǵan senbeımiz», – deıdi ol.

Osy jaǵdaıǵa qatysty Jetisý oblystyq densaýlyq saqtaý basqarmasy tergeý júrip jatqanyn aıtty.

«Qaıtys bolǵan adamǵa qatysty aqparatty tek polısıa men sot-medısınalyq saraptamadan ǵana alasyzdar. Tergeý júrip jatyr. Sondyqtan, densaýlyq saqtaý basqarmasy eshqandaı aqparat bere almaıdy. Oǵan quqyǵymyz joq, – dep jaýap berdi basqarmanyń baspasóz qyzmetinen.

Al, marqumnyń týystary máıitti sot-medısınalyq saraptamasyz alǵandaryn aıtady.

«Máıithanadan eshqandaı qujatsyz aldyq. Sińlimniń denesinde saý jer qalmaǵan. Ústi-basy kógala qoıdaı kógerip ketken. Ashyq jaraqattar da bar. Bul – turmystyq zorlyq-zombylyqtyń aıqyn kórinisi. Ol kúıeýiniń qolynan qaza tapty. Tergeý ádil ótip, kináli adam laıyqty jazasyn alsa eken. Artynda qan jutyp qalǵan ata-anasy men eki jasqa da tolmaǵan kishkentaı qyzy qaldy», – deıdi ol.

Qaıǵyly oqıǵa kezinde eki jasar qyzy barlyq jaǵdaıdy kózimen kórgen. Qazir ol aýyr psıhologıalyq kúızeliske ushyrap otyr.

«Qyzymyz sóılemeıdi. «Mama, mama» dep qana kúbirleıdi. Túnde uıyqtamaıdy, qarańǵydan qorqady. Barlyǵyn kórdi, biraq aıtýǵa shamasy joq», - deıdi týystary.

Jetisý oblystyq Polısıa departamenti qazir qylmystyq is qozǵalyp, tergeý amaldary júrip jatqanyn málimdedi.

«Atalǵan fakti boıynsha polısıa qylmystyq is qozǵady. Kúdikti ustalyp, ýaqytsha ustaý ızolátoryna qamaýǵa alyndy. Qazir oqıǵanyń barlyq mán-jaıy anyqtalyp, tergeý júrgizilip jatyr. Tergeý múddesine baılanysty basqa aqparat jarıalaýǵa jatpaıdy,– delingen vedomstvo jaýabynda.