Aqtóbe oblysynyń Jarly aýylynda qaıǵyly oqıǵa boldy. 17 maýsym kúni 9 jastaǵy qyz bala jeke úıdiń aýlasynda ornalasqan, tereńdigi shamamen 10 metr bolatyn qudyqqa qulap ketken. Balany qutqarý úshin  38 jastaǵy sportshy qudyqqa túsip, qaıta shyǵa almaı qalǵan, dep habarlaıdy bairaqmedia.kz.

Qudyq qaraýsyz qalǵan, qoqysqa tolǵan.

Qutqarýshylar eki úıge ortaq aýlada ornalasqan, ishine qoqys tógilgen qudyqtan bala men eresek adamdy es-tússiz hálde alyp shyqqan. Ekeýi de jedel járdem kelgenshe qaıtys boldy.

«Qutqarýshylardyń kómegimen bala men eresek adam qudyqtan es-tússiz kúıde shyǵaryldy. Aýdandyq tótenshe jaǵdaılar qyzmetiniń mamandary shuǵyl túrde alǵashqy medısınalyq kómek kórsetti. Alaıda qabyldanǵan sharalarǵa qaramastan, ekeýi de qaıtys boldy», – dep habarlady Aqtóbe oblysy TJD.

Qazir oqıǵaǵa qatysty tekseris júrgizilip jatyr.

Marqum er adam Baıǵanın balalar-jasóspirimder sport mektebiniń erkin kúres jattyqtyrýshysy, alty balanyń ákesi Nurbol Berdiǵalıev bolyp shyqty. 

Nurbol Berdiǵalıev 2017 jyldan beri Jarly aýylynda turyp, jumys istegen. Ol respýblıkalyq jáne oblystyq týrnırlerdiń 40-qa jýyq jeńimpazy men júldegerin daıyndaǵan. 20 shákirti sport sheberligine úmitker ataǵyn aldy.

Nurbol sol úıdiń kórshisi bolǵan. Marqumnyń artynda 6 balasy qaldy.