Premer-mınıstr Oljas Bektenov óńirlerge bólinetin qarajattyń tıimdi ári ýaqytynda ıgerilýine basa nazar aýdardy, dep habarlaıdy Bairaqmedia.kz.

Úkimet otyrysynda ol Ulytaý oblysynyń ákimine ótken jyly gazdandyrýǵa bólingen qarjynyń tıisinshe ıgerilmegenin synǵa aldy.

Ótken jyly Ulytaý oblysyn gazben qamtýǵa 3,9 mlrd teńge bólindi. Alaıda olardyń 77 mln teńgesi ǵana ıgerildi. Sebebi nede? – dedi Oljas Bektenov.

Oblys ákimi Dastan Ryspekov qarajattyń ıgerilmeý sebebin jobalyq qujattama merziminiń uzartylýy jáne qurylys jumystarynyń tek jyly mezgilde júrgizilýimen baılanystyrdy.

«Byltyr gaz qubyryn salýǵa 3,9 mlrd teńge bólindi, onyń ishinde Jezqazǵan qalasynda gaz taratý jelilerin salýǵa 2,9 mlrd teńge bólindi, alaıda gaz taratý jelileri qurylysynyń III kezeginiń jumys qujattamasyn ázirleýdi merziminiń uzarýyna baılanysty 2,8 mlrd teńge ıgerilmedi jáne qurylys-montajdaý jumystary jyly ýaqytta júrgizilýine baılanysty qarajat alynyp tastaldy. Osy jobany odan ári iske asyrý osy jylǵa josparlanǵan», – dedi Dastan Ryspekov.

Onyń aıtýynsha, Jezqazǵan qalasy boıynsha 154,4 shaqyrym gaz taratý jelisi 3 677 úıge salynyp, onyń ishinde 1 583 úı gazǵa qosylǵan (43%). 2025 jyly 2 094 úı gazben qamtylady. Jańaarqa aýdany Atasý kentiniń gaz qubyryn salýǵa bólingen 1 mlrd teńge qarajat sot rásimderine baılanysty ıgerilmegen. Bıyl Ulytaý oblysyn gazben qamtýǵa 3,1 mlrd teńge bólindi. Bólingen qarajatty merziminde ıgerý josparlanǵan. Barlyǵy oblys boıynsha 2030 jylǵa deıingi kezeńde 18 425 úı gazben qamtylady jáne gazben qamtý deńgeıi 3,5%-ten 41%-ǵa deıin artady.

Basqa óńirlerde qarajat jetispeıdi. Sizderge aqsha bólindi, biraq nátıje joq. Áreket etińiz,  –  dep atap ótti Oljas Bektenov.