Bıyl «Qazaq válsiniń koroli» atanǵan Shámshi Qaldaıaqovtyń týǵanyna 95 jyl. Osyǵan oraı Almatyda sazgerdiń óshpes óner týyndylary shyrqalǵan án keshi ótti dep habarlaıdy bairaqmedia.kz
«Án aǵa-jan aǵa» atty konsertti Túrkistan oblystyq Shámshi Qaldaıaqov atyndaǵy fılarmonıa ujymy uıymdastyrǵan.
Dańqty kompozıtordyń ánderin tyńdaýǵa kelgen halyqty «Tumar» etno-folklorlyq ansambli Shámshi ánderin aspapta oınap qarsy aldy. Ánsúıer qaýym birtýar sazgerdiń ózi qoldanǵan buıymdary men kıimderin tamashalaý múmkindigine de ıe boldy. Sondaı –aq, Shámshi aýylynan alynǵan ulttyq taǵamdardan aýyz tıdi. Arnaıy taqtaıshalardan Shámshi ánderiniń shyǵý tarıhynan habardar boldy.
Keshte 60 jyldan astam tarıhy bar óner ordasynyń ártisteri men estrada juldyzdary Uly kompozıtordyń tańdaýly shyǵarmalaryn oryndady. Konsert barysynda Shámshi Qaldaıaqovtyń ómiri men shyǵarmashylyǵyna arnalǵan beınerolıkter kórermenge jol tartty.
Shámshi ánderiniń keshinde Respýblıka saraıy ádettegideı lyq toly boldy. Bul álbette ónerpazdarǵa úlken shabyt syılaǵan.
