Búgin tańnan 7 jasar Aızereniń úıiniń aldynda adam kóp. Jerleý rásiminde qara jamylǵan otbasynyń týystarynan bólek, tilshiler, jedel járdem qyzmetkerleri de júr dep habarlaıdy bairaqmedia.kz

Qaıǵydan qan jutqan otbasy bastapqyda janazaǵa tilshilerdiń qatysýyna qarsy bolǵanymen, keıin bir aýyzdan ruqsat berdi. Olar ekinshi synyp oqýshysynyń qazasyna kinálilerdiń tıisti jazaǵa tartylýyn talap etýde.

Marqumnyń týystarynyń biri onyń aldynan jyldamdyqpen ótken avtobýs júrgizýshisi de kináli dep esepteıdi. Sodan qorqyp, qyz artqa qaraı júrgen deıdi ol. Sóıtip, júk kóliginiń astynda qalǵan. 

Avtobýs júrgizýshisiniń jazalanýyn suraımyz. Ol ólimmen aıaqtalǵan jol apatyna sebep boldy. Joǵary jyldamdyqpen júıtkip kele jatqanynan bala qorqyp, artqa qaraı shegindi, - dedi kózine jas alǵan marqumnyń týys aǵasy.

Mundaı apat osy jaıaý júrginshiler jolaǵynda birinshi ret bolyp otyrǵan joq deıdi jergilikti turǵyndar. 

Aıta keteıik, marqum otbasyndaǵy 4 balanyń úshinshisi bolǵan. Iaǵnı, eki ápkesi men inisi bar eken.

Eske salaıyq, qaıǵyly oqıǵa keshe saǵat 12:17-de Almaty qalasynyń Qarasý yqshamaýdanynda boldy. Buryndaı kóshesimen kele jatqan Renault júk kóligi Novoe kóshesiniń qıylysynda jaıaý júrginshiler jolaǵymen ótip bara jatqan oqýshyny qaǵyp ketken. Bala alǵan jaraqattarynan sol jerde kóz jumdy. Júk kóliginiń júrgizýshisi ustalyp, ústinen qylmystyq is qozǵaldy. Qaıǵyly oqıǵa Aızere Ibraevanyń anasynyń kóz aldynda bolǵan. Qosymshadan kele jatqan qyzyn ol joldyń arǵy betinde kútip turǵan eken.