Almatyda aıtysker aqyn Balǵynbek Imashevtyń uly alaıaqtyq boıynsha tergelip jatyr. Buǵan qajylyqqa usha almaǵan týrıserdiń shaǵymy sebep. Danıar Imashev solarǵa joldama satqan «Qazaq travel» kompanıasynyń atqarýshy dırektory dep habarlaıdy bairaqmedia.kz

Búgin tańda qasıetti mekenge ushýy tıis bolǵan týrıser qazir Áýezov aýdandyq polısıa basqarmasyn aınalshyqtap júr. Sebebi,  «Qazaq travel» kompanıasy 1 kún qalǵanda olardyń eshqaıda ushpaıtynyn málimdepti. 

Toǵyzy kúni ushatyn reısimizde eshqandaı adam ushqan joq. Bir halyqqa shyǵyp, úndeý aıtqan joq. Bılettiń baǵasy ósip ketti aý, basqa da jaǵdaı bolyp qaldy aý degen úndeý bolǵan joq. Bizge eshqandaı dálel kórsetip turǵan joq. Bılet, qonaqúı tólendi degendi áli kórsetken joq,  - dedi Medına Jarylǵapova esimdi «Qazaq travel» kompanıasynyń klıenti.

Qazir kompanıanyń keńsesi jabyq tur. Al, Mádına men Mekkege usha almaǵan 50-ge tarta adam polısıaǵa shaǵym túsirgen. Sóıtip, polıseıler alaıaqtyq deregi boıynsha qylmystyq is qozǵapty. Kúdikti retinde úsh adam tanylǵan. Olardyń qatarynda kompanıanyń atqarýshy dırektory Danıar Imashev ta bar. Jurttyń qajylyqtan qalý sebebin suraǵan tilshilerge ol búgin ún qatpady. 

Esesine, týyndaǵan qıyndyqtyń sebebin bolashaq qajylarǵa onyń ákesi túsindirip bergen. Balǵynbek Imashev áýe bıletteriniń de, qonaqúı baǵasynyń da qymbattap ketkenin aıtady. Ári munda eshqandaı alaıaqtyq joq dep sendiripti.

Kóp adamdar aksıamen alǵan. Arzan baǵada aldy. Qazir baǵa qymbattap jatyr. Qymbat bılet alynyp jatyr. Ushaqtyń baǵasy qymbat bolyp jatyr. Qonaqúıdiń baǵasy qymbat bolyp jatyr. Sol sebepti quryltaıshylar óz qaltasynan qosyp, qarjy salyp, sizderdiń qyzmetterińizde bolýǵa talpynyp jatyr, - depti aıtysker aqyn Balǵynbek Imashev. 

Al, Ýmraǵa usha almaǵandar buǵan senbeıdi. Olar tólengen qarajatty qaıtarýdy talap etedi. Ári «Qazaq travel-ge» ózge musylmandar aldanbasa deıdi.