Семейде екі 13 жастағы сыныптас арасындағы пышақтасуға қатысты оқиғаның екінші тарапы да өз нұсқасын айтты. Жарақат алған екінші оқушы Дәулет Жұмабековтің туыстары жасөспірім төбелесті бірінші болып бастамағанын мәлімдеді, деп хабарлады Вairaqmedia.kz.
Бұл туралы Инфорбюро жазды.
Оқиға 10 қыркүйекте сабақтан тыс уақытта болған. Ашық дереккөздердегі мәлімет бойынша, екі жасөспірім Семейдегі №52 мектептің 9-сыныбында бірге оқиды. Бұған дейін олар дос болып, күрес үйірмесіне де бірге қатысқан. Мектеп өкілдері екі оқушының да профилактикалық есепте тұрмағанын, бұған дейін құқық бұзушылықпен тіркелмегенін айтқан.
Бұған дейін БАҚ-та екінші оқушы Омардың туыстарының нұсқасы жарияланған еді. Олардың айтуынша, жасөспірімдер сабақтан кейін ат үйретіп, бірге ойнау үшін кездескен. Жанжал кезінде Омар көптеген пышақ жарақатын алған. Оның әпкесі баланың оқиға орнынан қашып шығып, жақындарының үйіне жеткенін айтқан.
Дәрігерлер Омарға іш қуысына өткен пышақ жарақаты, оң жақ бүйрек пен үлкен шарбының зақымдануы, іш қуысына қан кету, сондай-ақ денесі мен аяқ-қолындағы көптеген жарақаттар диагнозын қойған. Ол геморрагиялық шок жағдайында ауруханаға түсіп, бірнеше сағатқа созылған операциядан кейін жансақтау бөлімінен палатаға ауыстырылған.
Енді жарақат алған екінші оқушы Дәулет Жұмабековтің жақындары да оқиғаның өздеріне белгілі мән-жайын айтқысы келетінін жеткізді.
«Күрестік, сосын төбелесіп қалдық. Бірақ төбелескен кезде пышағын цементтің үстіне қойып қойған. Сосын жүгіріп барып алып шықты. Содан кейін одан тартып аламын дегенде қолымды жарақаттап алдым. Мойнымды білмеймін қалай жарақаттағанымды. Ол қаша бергенде мен жүгіре арқасынан пышақ салдым», - деді Дәулет Жұмабеков.
Олардың сөзінше, Дәулет төбелесті бастамаған. Бұл — жасөспірімнің туыстарының мәлімдемесі, ал жанжалдың нақты қалай басталғаны әзірге тергеумен түпкілікті анықталған жоқ.
