Теміртауда жасөспірімдердің зейнеткердің үйіне кіріп, ұрып-соғуына байланысты қала әкімінің орынбасары қатаң сөгіс алды. Бұл туралы Қарағанды облысы әкімі Ермағанбет Бөлекбаев айтты, деп хабарлайды Bairaqmedia.kz.
Бүгін менің орынбасарым Әлібек Әлденей Қарағанды облысы бойынша кәмелетке толмағандардың істері және олардың құқықтарын қорғау жөніндегі комиссияның отырысын өткізді. Теміртау қаласы әкімінің әлеуметтік мәселелер жөніндегі орынбасарына кәмелетке толмағандарға тиісінше бақылау жасамағаны үшін қатаң сөгіс жариялауды тапсырдым. Сондай-ақ, жасөспірімдер оқыған білім беру мекемелері директорларының орынбасарлары тәртіптік жауапкершілікке тартылды, – деді Ермағанбет Бөлекбаев.
Оның айтуынша, барлық кінәлілер қолданыстағы заңнама шеңберінде жауапкершілікке тартылады. Бұл оқиға бойынша полиция тергеу жүргізіп жатыр.
Сондай-ақ ата-аналардан, педагогтардан балаларды тәрбиелеуге және олардың басқа адамдарға құрметпен қарауын, дұрыс құндылықтарды қалыптастыруға көбірек көңіл бөлуді сұраймын. Біз өз тарапымыздан жасөспірімдерді әлеуметтік қолдау мен алдын алу шараларын күшейту жұмыстарын жалғастырамыз, – деді облыс әкімі.
